एजेन्सी – कप्तान बेन स्टोक्सको सानदार शतकका बाबजुद इंग्ल्यान्ड द एशेज सिरिजको दोस्रो टेस्ट खेलमा अष्ट्रेलियासँग ४३ रनले पराजित भएकोछ । योसँगै पाँच टेस्ट खेलको सिरिजमा अष्ट्रेलियाले २-० को अग्रता लिएको छ ।

जितको लागि ३ सय ७१ रनको विजयी लक्ष्य पछ्याएको इंग्ल्यान्ड ३ सय २७ रनमा अल आउट भयो । इंग्ल्यान्डका बेन स्टोक्सले २ सय १४ बलमा ९ चौका र ९ छक्कासहित १ सय ५५ रनको एक सानदार इनिङ खेलेपनि टोलीलाई जिताउन सकेनन् ।

स्टोक्स जोश हेजलवुडको बलमा टप एज लागेर विकेटकिपर एलेक्स केरीबाट क्याच आउट भए । स्टोक्स आउट हुँदा इंग्ल्यान्डलाई जितको लागि ७० रन चाहिँएको थियो । तर स्टोक्स आउट भएपछि अन्तिम तीन खेलाडी बलर हुँदा जितको सम्भावना कठिन बनेको थियो ।

जोनी बेयरस्टो नाटकीय रुपमा १० रनमा स्टम्पिङ आउट भए । क्यामरन ग्रिनको ५२ औं ओभरको अन्तिम बाउन्सर बल उनी छाड्दै अघितर्फ बढेका थिए । बेयरस्टो नन स्ट्राइकमा बेन स्टोक्सतर्फ जादै गर्दा विकेटकिपर एलेक्स केरीले पछिबाट स्टम्पमा हानेपछि आउट हुन पुगेका थिए । त्यो आउट हारको एक कारण बन्यो ।

ओपनर बेन डकेट १ सय १२ बलमा ९ चौकासहित ८३, जो रुट १८ र ह्यारी ब्रुक ४ रनमा आउट भए । अष्ट्रेलियाका मिचेल स्टार्क, प्याट कमिन्स र जोश हेजलवुडले समान तीन विकेट लिए ।

त्यसअघि अष्ट्रेलिया दोस्रो इनिङमा २ सय ७९ रनमा अल आउट भएको थियो । अष्ट्रेलिया ओपनर उस्मान खवाजा ७७, डेविड वार्नर २५, मार्नस लाबुसेन ३० र स्टिभ स्मिथ ३४ रनमा आउट भए । इंग्ल्यान्डका स्टुअर्ट ब्रोडले चार विकेट लिए । टोश टोङ्गे र ओली रोविन्सनले समान दुई विकेट लिए ।

इंग्ल्यान्ड पहिलो इनिङमा ३ सय २५ रनमा अल आउट भएको थियो । इंग्ल्यान्डका बेन डकेट १ सय ३४ बलमा ९ चौकासहित सर्वाधिक ९८ रनमा आउट भएका थिए । ह्यारी ब्रुक ५०, जो रुट १०, ओली पोप ४२, ज्याक क्रली ४८, बेन स्टोक्स १७ र जोनी बेयरस्टो १६ रनमा आउट भएका थिए । अष्ट्रेलियाका मिचेल स्टार्कले तीन, जोश हेजलवुड र टर्विस हेडले समान दुई विकेट लिए ।

त्यसअघि पहिलो इनिङमा अष्ट्रेलिया दास्रो दिन पहिलो सेसनमा ४ सय १६ रनमा अल आउट भएको थियो । अष्ट्रेलियाका पूर्वकप्तान स्टिभ स्मिथले १ सय ८४ बलमा १५ चौकासहित १ सय १० रनको शतकीय इनिङ खेलेका थिए । स्मिथनै खेलेको प्लेयर अफ द म्याच चुनिए ।

ओपनर डेविड वार्नर ८८ बलमा ८ चौका र १ छक्कासहित ६६, उस्मान खवाजा १७, मार्नस लाबुसेन ४७, क्यामरन ग्रिन डक, एलेक्स केरी २२, नाथन लायन ७ र जोश हेजलवुड ४ रनमा आउट भए । प्याट कमिन्स ४३ बलमा २ चौकासहित २२ रनमा नट आउट रहे ।

इंग्ल्यान्डका ओली रोविन्सन र जोश टोंगेले समान तीन विकेट लिए । जो रुटले दुई, जेम्स एन्डरसन र स्टुअर्ट ब्रोडले समान एक विकेट लिए । अष्ट्रेलिया पहिलो खेलमा दुई रनले विजयी भएको थियो । तेस्रो खेल बिहीबारबाट सुरु हुनेछ ।