एजेन्सी – पाकिस्तानले अर्को महिना चीनमा हुने १९ औं एसियन खेलकुद खेल्ने टोली घोषणा गरेको छ । पाकिस्तानले युवा खेलाडी कासिम अक्रमको कप्तानीमा १५ सदस्य टोली घोषणा गरेको छ ।

पाकिस्तानको टोलीमा सिनियर टोलीका आसिफ अली, हैदर अली र खुशदील शाह गरि तीन स्टार ब्याटर छन् । तीव्र गतिका बलर मोहम्मद हसनैन र शाहनवाज दाहानी पनि टोलीमा छन् । यी बाहेक अमैर जमल, अर्शद इकवाल र उस्मान कादिरले पनि पाकिस्तानबाट खेलेका छन् ।

पाकिस्तानले टि२० विशेष खेलाडीलाई प्राथमिकतामा राख्दै दोस्रो रोजाईको टोली पठाएको छ । सबै टेस्ट टोलीले दोस्रो रोजाईका टोली पठाउनेछन् । आगमी अक्टोबर ५ देखी भारतमा विश्वकप हुँदा पहिलो रोजाईका टोली जाने छैनन् । नेपालसहित एसोसियट टोलीले भने पहिलो रोजाईको टोली पठाउनेछन् ।

पाकिस्तानले प्रतियोगितामा सिधैं क्वाटरफाइनल खेल्नेछ । क्वाटरफाइनल ३ र ४ अक्टोबरमा हुनेछ । सेमिफाइनल ६ अक्टोबरमा हुनेछ । फाइनल ७ अक्टोबरमा हुनेछ । प्रतियोगिता टि२० शैलीमा हुनेछ । नेपालले भने समूह चरण पार गर्दै क्वाटरफाइनल खेल्नुपर्ने हुन्छ ।

पाकिस्तानको टोली :

कासिम अक्रम (कप्तान), ओमैर बिन युसुफ, अमैर जमल, अराफत मिनहास, अर्शद इकवाल, आसिफ अली, हैदर अली, खुशदील शाह, मिजा ताहिर बैग, मोहम्मद हसनैन, मोहम्मद अखलाक, राहिल नाजिर, शाहनवाज दाहानी, सुफ्यान मकीम र उस्मान कादिर ।