काठमाडौं (हाम्रो खेलकुद) – नेपालले त्रिकोणात्मक टि२०आई सिरिजको अन्तिम लिग खेलमा यूएईलाई हराउने क्रममा आफ्नो टि२०आई इतिहासको सबैभन्दा ठूलो लक्ष्य पछ्याएको छ ।

फाइनल पुगिसकेको नेपालले यूएईलाई ५ विकेटले पराजित गर्दै सिरिजमा अपराजित यात्रा पनि कायम राख्यो । जितका लागि १ सय ६५ रनको लक्ष्य पछ्याउने क्रममा नेपालले १९.२ ओभरमा ५ विकेट गुमाएर लक्ष्य पूरा गरेको थियो ।

नेपालले आफ्नो टि२०आई क्रिकेट इतिहासमा पूरा गरेको यो सबैभन्दा ठूलो लक्ष्य पनि हो । यसअघि नेपालले केन्याविरुद्ध सन् २०२२ मा १ सय ६० रनको लक्ष्य पूरा गरेको थियो ।

मुलपानी क्रिकेट मैदानमा सोमबार नेपालका लागि ओपनर असिफ शेखले सर्वाधिक ६२ रनको योगदान दिए । कप्तान रोहित पौडेल ४७ रन जोड्दै १८ औं ओभरमा पेभेलियन फर्केका थिए । दीपेन्द्रसिंह ऐरीले १४ बलमा ६ चौका र १ छक्कासहित ३९ रन जोड्दै नेपाललाई जितसम्म पुर्याएका थिए ।

नेपालले सुरुवाती ३ ओभरमै ओपनर कुशल भुर्तेल, सोमपाल कामी र कुशल मल्लको साथ गुमाएको थियो । त्यसपछि कप्तान रोहितकुमार पौडेल र आसिफ शेखले ९९ रनको साझेदारी गर्दै नेपाललाई खेलमा कायम राखेका थिए ।

आसिफले १६ औं ओभरमा आउट हुनुअघि ५० बलमा ६ चौका र २ छक्का प्रहार गरे । उनी मुहमद जवादुल्लाहको बलमा बोल्ड भएका थिए । त्यसपछि दीपेन्द्र र रोहितले पाँचौ विकेटका लागि १५ बलमा ३७ रनको आक्रामक साझेदारी गर्दै नेपाललाई जिततर्फ डोर्याएका थिए ।

इनिङको चौथो बलमा कुशल भुर्तेल मुहमद जवादुल्ल्लाबाट बोल्ड भए । दोस्रो ओभरको पाँचौ बलमा सोमपाललाई अकिफ राजाले कट बिहाईन्ड गराए । तेस्रो ओभरमा कुशल मल्ल एक रन जोड्ने क्रममा बसल हमिदबाट नन स्ट्राइक एण्डमा रनआउट हुँदा नेपाल समस्यामा परेको थियो ।

त्यसअघि नेपालले टस जितेर पहिलो ब्याटिङको निम्तो दिएपछि यूएईले २० ओभरमा ७ विकेट गुमाउँदै १ सय ६४ रन जोडेको थियो । यूएईका लागि बसिल हमिद र वृत्य अरविन्दले ४५-४५ रनको योगदान दिए ।

बसिलले १९ बलमा २ चौका र ५ छक्का प्रहार गरेका थिए । इनिङको अन्त्यतिर उनको आक्रामक ब्याटिङकै कारण यूएईले राम्रो योगफल खडा गरेको थियो । त्यसअघि वृत्यले मध्यक्रम सम्हाल्ने क्रममा ५१ बलमा ४ चौका प्रहार गरे ।

अब सिरिजको फाइनल शुक्रबार टियु अन्तर्राष्ट्रिय क्रिकेट मैदानमा हुनेछ । त्यसअघि बुधबार यूएई र हङकङले प्रतिस्पर्धा गर्नेछन् । नेपालको ४ खेलमा ८ अंक हुँदा यूएईको ३ खेलमा २ अंक छ । हङकङ अंकविहिन छ ।