एजेन्सी – इन्डियन प्रिमियर लिग (आइपिएल) अन्तर्गत आज दुई खेल हुँदैछ । पहिलो खेलमा राजस्थान रोयल्सले लखनउ सुपर जायन्टसको सामना गर्दा दोस्रो खेलमा मुम्बई इन्डियन्स र गुजरात टाइटन्स खेल्नेछन् ।

शनिबार भएको खेलमा पन्जाब किंग्सले दिल्ली क्यापिटल्सलाई ४ विकेटले हराएको थियो । दोस्रो खेलमा कोलकाता नाइट राइडर्सले सनराइजर्स हैदरावादलाई ४ रनले पराजित गर्यो । त्यसअघि शुक्रबार भएको उद्घाटन खेलमा चेन्नई सुपर किंग्सले रोयल च्यालेन्जर्स बेंगलुरुलाई ४ विकेटले हराएको थियो ।

मुम्बई र गुजरात खेल्दा यसपटक नजर हार्दिक पान्ड्यामा हुनेछ । यसै सिजन गुजरात छोडेर मुम्बई फर्केका उनले टोलीको कप्तानी पनि गर्दैछन् । टोलीमा आन्तरिक समस्या रहेको चर्चा भएपनि टोलीमा स्टार खेलाडी छन् । यता गुजरात मोहमद शामी र पान्ड्याको अनुपस्थितिमा शुभमन गीलको कप्तानीमा उत्रनेछ ।

राजस्थान यशस्वी जैसवालको अन्तर्राष्ट्रिय करिअरको उच्च लय आइपिएलमा पनि कायम रहने अपेक्षामा हुनेछ । त्यस्तै केएल राहुलको कप्तानीमा लखनउ शुखद सुरुवात गर्ने सुरमा हुनेछ । वेस्ट इन्डिजका तीव्र गतिका बलर शमार जोसेफमाथि धेरैको नजर हुनेछ ।