एजेन्सी – घरेलु टोली अस्ट्रेलियाले पाकिस्तानमाथि पहिलो टि ट्वान्टी आई खेलमा बिहीवार सहज जित हासिल गरेको छ ।

अस्ट्रेलिया डकवर्थ लुईस पद्दतीमा २९ रनले विजयी भएको हो । पहिलो टि ट्वान्टी आईमा जितका साथ अस्ट्रेलियाले ३ खेलको टि ट्वान्टी आई सिरिजमा १-० को अग्रता बनाएको छ ।

वर्षाका कारण खेल ७ ओभरमा छोट्याईएको थियो । ९४ रनको लक्ष्य पछ्याएको पाकिस्तानले निर्धारित ७ ओभरमा ९ विकेट गुमाएर ६४ रन मात्र जोड्न सक्यो ।

पाकिस्तानका अब्बास अफ्रिदीले १० बलमा २ चौका र १ छक्काको सहयोगमा नट आउट रहँदै सर्वाधिक २० रन जोडे ।

हसिबुल्लाह खानले ८ बलमा १२ तथा शाहिन शाह अफ्रिदीले ६ बलमा ११ रन जोड्दा अन्य ब्याटरले दोहोरो अंकमा रन बनाउन सकेनन् ।

अस्ट्रेलियाका लागि जेभियर ब्राटलेट र नाथन एलिसले समान ३ तथा स्पेन्सर जोनसनले १ विकेट लिए

त्यसअघि ब्रिसबन क्रिकेट स्टेडियममा टस हारेर ब्याटिङको निम्तो पाएको घरेलु टोलीले निर्धारित सात ओभरमा चार विकेट गुमाएर ९३ रन को योगफल तयार गरेको थियो ।

अस्ट्रेलियाका लागि खेलको प्लेयर अफ द म्याच समेत भएका ग्लेन म्याक्सवेलले १९ बलमा ५ चौका र ३ छक्काको सहयोगमा सर्वाधिक ४३ रन जोडेका थिए ।

मार्कस स्टोईनेसले ७ बलमा २ चौका र १ छक्काको सहयोगमा २१ तथा टिम डेभिडले ८ बलमा १० रन बनाएका थिए ।

पाकिस्तानका लागि अब्बास अफ्रिदीले २ तथा नसिम शाह र हरिस रउफले समान १ विकेट लिएका थिए ।

यसअघि भएको ३ खेलको ओडिआई सिरिज पाकिस्तानले २-१ ले जितेको थियो । दुई देशबीचको दोस्रो टि ट्वान्टी आई शनिवार सिड्नीमा हुनेछ ।