सुमन अधिकारी,बुटवल

दाङमा लुम्बिनी प्रदेश स्तरीय टि ट्वान्टी क्रिकेट प्रतियोगिता–२०८१ सोमवार सुरु भएको छ ।

पहिलो दिन रुपन्देही र दाङ विजयी भएका छन् ।रुपन्देहीले नवलपरासीलाई ८४ रनले र दाङले रोल्पालाई १० विकेटले‌ हराएको छ।

लमहिस्थित देउखुरी क्रिकेट मैदानमा भएको खेलमा टस हारेर पहिले ब्याटिङजको निम्ता पाएको रुपन्देहीले १ सय ४६ रन बनाएको थियो ।

जसमा रुपन्देहीले लागि प्रज्वल थापाले ३७ बलमा १ छक्का र ६ चौकाको मद्दतमा ५० रन बनाए । उनी इक्लाक अहमद वारसीको बल आउट भए ।

मनिष थापाले १६ रन, सुमन पाण्डेले १५ रन, अजय चौहान र कप्तान देव खनालले समान १२ रन तथा मृनाल गुरुङले १० रन जोडे ।

नवलपरासीका इक्लाकले २, दीलिप कुर्मी, जितेन्द्र केवट सहनी, शिशिर थापा, यमन भण्डारीले समान १ विकेट लिए ।

१ सय ४७ रनको लक्ष्य पछ्याएको नवलपरासी १७.४ ओभरमा अलआउट हुदै मात्र ६२ रनमा समेटियो । ओमकार यादवले सर्वाधिक ३१ रन , दीलिप कुर्मीले ११ रन जोड्ने बाहेक अरु कुनै पनि ब्याटरले दोहोरो अंक बनाउन सकेनन् ।

रुपन्देहीका रमेश कुर्मीले ४ ओभरमा ८ रन खर्चेर ४ विकेट लिए । बिपर्शन केसीले र २ कृष्ण कार्कीले समान २ र अजय चौहानले १ विकेट लिए । रुपन्देहीका रमेश कुर्मी प्लेयर अफ द म्याच भए ।

दाङ घोराहीमा भएको अर्को खेलमा टस जितेर पहिले ब्याटिङ गरेको रोल्पाले १०.४ ओभरमा सबै विकेट गुमाएर जम्मा २५ रन बनायो । जसमा दुर्गेश पुरीले सबैभन्दा धेरै १३ रन जोडे ।

रोल्पाले दिएको २६ रनको सामान्य लक्ष्य दाङले ४.२ ओभरमा विकेट नगुमाई जित निकाल्यो । प्लेयर अफ दि म्याच दाङका शुभम खनालले १. ४ ओभर २ रन खर्चेर ३ विकेट लिए ।

लुम्बिनी प्रदेश खेलकुद परिषदको आयोजनामा भएको
प्रतियोगितामा प्रदेशका १२ जिल्ला मध्ये रुकुम पूर्व बाहेकका जिल्लाको सहभागिता छ ।