एजेन्सी – इङ्ग्ल्याण्डमा जारी वर्ल्ड च्याम्पियनसिप लिजेन्ड्समा पाकिस्तान च्याम्पियन्सले दक्षिण अफ्रिका च्याम्पियन्सलाई ३१ रनले पराजित गरेको छ ।

लेस्टरमा शुक्रवार १ सय ९९ रनको लक्ष्य पछ्याएको दक्षिण अफ्रिका निर्धारित २० ओभरमा ९ विकेट गुमाएर १ सय ६७ रनमा समेटियो ।

दक्षिण अफ्रिका च्याम्पियन्सका गि मोर्नी भानले २० बलमा ५ चौका र २ छक्काको सहयोगमा ४४ रन जोडे । वाइनी पार्नेलले ९ बलमा २ चौका र १ छक्काको सहयोगमा २१ रन बनाए ।

सरेल इर्वे १२, जेपी डुमीनी ११ तथा क्रिस मोरिस र ज्याक्स रोडोल्फ समान १० रनमा आउट भए ।

पाकिस्तान च्याम्पियन्सका सोहेल तन्विर र मोहम्मद हाफिजले समान २ तथा रुम्मन रइस, इमाद वासिम, शोहेल खान, शोयब मल्लिक र वाहब रियाजले समान १ विकेट लिए ।

त्यसअघि टस हारेर पहिले ब्याटिङ गरेको पाकिस्तान च्याम्पियन्सले निर्धारित २० ओभरमा ५ विकेट गुमाएर १ सय ९८ रन बनाएको थियो ।

पाकिस्तानका लागि उमर अमिनले ४२ बलमा ४ चौका र ३ छक्काको सहयोगमा ५८ रनको अर्धशतकीय इनिङ खेले ।

शोयब मल्लिक ३४ बलमा ५ चौकाको सहयोगमा ४६ रनमा अविजित रहे । आसिफ अलि ११ बलमा २३, शर्जिल खान १९ र कमरान अकमल १७ रनमा आउट भए ।

दक्षिण अफ्रिका च्याम्पियन्सका दुनि ओलिभरले २ तथा हार्डिस भिल्जोन, वायन पार्नेल, जेपी डुमीनीले समान १ विकेट लिए ।

खेलेको दुबै खेल जितेको पाकिस्तान च्याम्पियन्सले ४ अंकसहित दोस्रो स्थानमा छ । दक्षिण अफ्रिका च्याम्पियन्स ४ मध्ये ३ खेलमा जित हात पारेर ६ अंकका साथ शीर्ष स्थानमा छ ।

प्रतियोगितामा अन्तर्राष्ट्रिय क्रिकेटबाट सन्यास लिएका क्रिकेटरको सहभागिता छ। प्रतियोगितामा ६ टोलीको सहभागी छन् ।

राउण्ड रोबिन लिगका आधारमा हुने प्रतियोगिताको शीर्ष ४ टोली सेमिफाइनलमा पुग्नेछन् । प्रतियोगिताको फाइनल अगस्ट २ मा हुनेछ ।