काठमाडौं (हाम्रो खेलकुद)- रेडियन्ट रिडर्स एकेडेमी, सानेपाको आयोजनामा प्रथम आरआरए रनिङ सिल्ड क्रिकेट प्रतियोगिता अर्को साता सुरु हुने भएको छ।

रेडिनयन्टका एकेडेमीका संस्थापक प्रिन्सिपल डिके ढुंगानाले बिहीवार आयोजित पत्रकार सम्मेलनमा प्रतियोगितामा आयोजकका २ सहित १५ छात्र टोलीको सहभागिता रहने जानकारी दिए ।

सोमवार सुरु हुने प्रतियोगिताका सहभागी टोलीलाई ४ समूहमा विभाजन गरी लिग कम नकआउट आधारमा खेल खेलाइने छ ।

समूह ‘ए’ मा एलआरआई, डिएभी, संस्कृति र ब्लु बर्ड तथा समूह ‘बी’ मा अपी, ग्यालेक्सी, मनकामना र विश्व निकेतन रहेका छन् ।

भ्याली पब्लिक, गेट्वे, मोक्षदा र रेडियन्ट ‘बी’ समूह ‘सी’ मा छन् भने बालकुञ्ज, मृगसिरा वल्र्ड स्कुल र रेडियन्ट ‘ए’ समूह ‘डि’ मा छन् ।

खेल १० ओभरको हुने प्राविधिक प्रमुख रविन्द्र गुप्ताले जानकारी दिए। एक टोलीमा १० खेलाडी हुने छन् भने ८ जनाले खेल्ने छन् ।

विजेताले ३० हजार र दोस्रो टोलीले १५ हजार रुपैयाँ पुरस्कार प्राप्त गर्नेछ । प्रतियोगिता सञ्चालन गर्न करिब २ लाख रुपैयाँ खर्च हुने आयोजकले जनाएको छ ।

४ दिने प्रतियोगिताका खेलहरु आयोजक एकेडेमीको सानेपामै रहेको रेडियन्ट क्रिकेट एकेडेमीमा खेलाइने छ ।
संस्थापक प्रिन्सिपल ढुंगानाले विद्यार्थीलाई खेलकुदको माध्यमबाट पनि अगाडि बढाउन रेडियन्टले खेलकुदको विभिन्न क्षेत्रमा काम गर्दै आएको बताए ।

ढुंगानाले प्रतियोगिताले क्रिकेटको प्रवर्द्धनमा थोरै भएपनि सहयोग पुग्ने विश्वास व्यक्त गर्दै आउने दिनमा प्रतियोगितालाई बृहत रुपमा आयोजना गर्ने योजना रहेको जनाए ।