काठमाडौं (हाम्रो खेलकुद)- महिला राष्ट्रिय क्रिकेट टोलीकी कप्तान इन्दु बर्माले १ हजार रन पार गर्ने सपना पूरा भएको बताएकी छिन्।

घरेलु टोली मलेसियासँग टि ट्वान्टी आई सिरिजको चौथो खेलमा आज नटआउट ४८ रन बनाउँने क्रममा आह उनले १ हजार रनको कोसे ढुंगा पूरा गरेकी हुन्।

‘६ सय रन पार गरेपछि १  हजार रनको सपना देखेकी थिए,’ उनले हाम्रो खेलकुदसँग भनिन्, ‘आज त्यो सपना पूरा भयो। टि-ट्वान्टी आईमा १ हजार रन पूरा गर्ने इन्दु पहिलो नेपाली महिला खेलाडी बनेकी छिन्।

यसअघिका ७६ खेलमा इन्दुले ९ सय ८५ रन बनाएकी थिइन्। मलेसियासँग १५ रन जोडेसँगै उनको १ हजार रनको आँकडा पूरा भएको हो। आफ्नो करियरमा १ हजार १८ औं बलमा चौका प्रहार गर्दै उनले १ हजार रन पूरा गरेकी थिइन्।

आजको खेलपछि इन्दुको कुल रन १ हजार ३३ रन पुगेको छ । जसमा ७७ चौका र ३ छक्का सामेल छ।उनले एक पटक अर्धशतक बनाएकी छिन्। सन् २०२१ मा कतार विरुद्ध अविजित ५५ रन जोडेकी थिइन्। टि ट्वान्टी आईमा त्यो उनको व्यक्तिगत उच्च स्कोर पनि हो।

इन्दुले आज खेल्ने क्रममा भने १ हजार रन पूरा भएको आफूलाई थाहा नरहेको बताइन् । ‘मैदानमा हुँदा त्यसबारे थाहा नै थिएन । डगआउटबाट साथीहरुलेले ‘हजार रन पूरा भयो’ भनेपछि मात्र थाहा पाएँ,’ उनले भनिन्।

इन्दुले व्यक्तिगत उपलब्धिभन्दा टोलीको जित आफ्नो लागि महत्वपूर्ण हुने बताइन् । ‘मेरो लागि टोलीको जित नै प्रमुख हो। टोलीकै कारण मैले हजार रन पूरा गरेकी हुँ। त्यसको  खुसी खेल सकिएपछि ड्रेसिङ रूममा मनाएँ।’

इन्दुले अबको लक्ष्य  बिस्तारै १ हजार ५ सय हुँदै २ हजार रन पुर्याउने रहेको बताइन्। सर्वाधिक रन बनाउने दोस्रो नेपाली खेलाडी सीता राना मगर हुन्। उनले ६२ खेलमा ९ सय ६५ रन बनाएकी छिन्।