मस्कट (हाम्रो खेलकुद) – नेपालले आईसीसी टी ट्वान्टी विश्वकप एसिया तथा इएपी छनोटको आफ्नो पहिलो खेलमा कुवेतलाई १ सय ४२ रनको मध्यम लक्ष्य दिएकोछ । ओमान क्रिकेट एकेडेमी १ मा टस हारेर पहिला ब्याटिङको निम्तो पाएको नेपालले निर्धारित २० ओभरमा ७ विकेट गुमाउँदै १ सय ४१ रन बनायो ।

नेपालका कुशल भुर्तेलले ५६ बलमा ३ छक्का र ३ चौकासहित सर्वाधिक ६६ रन बनाए । गुल्शन झाले तल्लोक्रममा ६ बलमा ३ छक्कासहित महत्वपूर्ण २० रन बटुले ।

नेपालका ओपनर आसिफ शेख २, कप्तान रोहित पौडेल १५ बलमा ३ चौकासहित १६, दीपेन्द्रसिंह ऐरी २०, सन्दीप जोरा ५ र कुशल मल्ल ४ रनमा आउट भए ।

कुवेतको बलिङ सामु नेपालका कुनैपनि ब्याटरले कुनैपनि समय खुलेर खेल्न नसकेपछि अपेक्षा भन्दा निकै खराब ब्याटिङ गरेको थियो । १९ औं ओभरमा नेपालले २७ रन जोड्दै मध्यम योगफलमा पुगेको हो ।नेपालले १९ औं ओभरमा कुल २७ रन जोडेको थियो । गुल्शन झाले ३ छक्का र कुशल भुर्तेलले दुई चौका नविनराजलाई हानेका थिए ।

कुवेतका तीव्र गतिका बलर मोहम्मद अकिफ फारुकले तेस्रो ओभरमै अफसाइडको बल मिस गर्दै ओपनर आसिफ शेखलाई २ रनमा एलबीडब्लू आउट गरेका थिए ।

नेपालले चौथो ओभरको पहिलो बलमा यासिन पटेललाई प्रहार गरेको छक्का नै इनिङको पहिलो बाउन्ड्री थियो । नेपालले सुरुवाती ६ ओभरमा १ विकेट गुमाउँदै ३९ रन बनाएको थियो । उक्त समय कुशल भुर्तेल १९ बलमा २५ रन र रोहित पौडेल १० बलमा १० रनमा खेलेका थिए ।

लेगस्पिनर नविनराज राजेन्द्रानको योर्कर बलमा रोहित पौडेल १६ रनमा बोल्ड आउट हुँदा नेपाल ७.२ ओभरमा ४६–२ को अवस्थामा पुगेको थियो । दोस्रो विकेटलाई रोहित र कुशल भुर्तेलले ४१ रनको साझेदारी गरेका थिए । त्यसपछि नेपालले कुशल मल्ललाई ४ र सन्दीप जोरालाई ५ रनमा गुमाएपछि नेपाल ११.४ ओभरमा ६३–४ को अवस्थामा पुगेको थियो ।

नेपालले सातौं ओभरको पहिलो बलमा चौका हानेपछि फेरि बाउन्ड्री हान्न ६२ बल लागेको थियो । दीपेन्द्रले १७ औं ओभरको तेस्रो बलमा छक्का हान्दै बाउन्ड्री खडेरी तोडेका थिए । यसै ओभरको अन्तिम ओभरमा कुशल भुर्तेलले छक्का हान्दै नेपालको एक सय रन आकाडा १७ औं ओभरमा पूरा गरेका थिए । दीपेन्द्र १९ बलमा १ छक्कासहित २० रनमा रन आउट भए ।

कुवेतका नविनराज राजेन्द्रानले ४ ओभरमा ४० रन खर्चेर २ विकेट लिए । अनुपदीपले २, मोहम्मद अस्लाम र मोहम्मद फारुकले १-१ विकेट लिए ।