काठमाडौं (हाम्रो खेलकुद)- ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले आज कीर्तिपुरस्थित त्रिभुवन विश्वविद्यालय (टियु) क्रिकेट मैदानको निरीक्षण गरेका छन्।

निरीक्षणपछि मन्त्री घिसिङले क्रिकेट मैदान निर्माणलाई सरकारले उच्च प्राथमिकतामा राखेको बताए। स्टेडियम सबैका लागि महत्वपूर्ण भएकाले छिटोभन्दा छिटो निर्माण पूरा गरी हस्तान्तरण गर्न उनले निर्माण कम्पनीलाई निर्देशन दिएको पनि जानकारी गराए।

उनका अनुसार निर्माण कार्यलाई अघि बढाउन अर्थ मन्त्रालयले समेत सहयोग गर्नेछ। मन्त्री घिसिङले सरकारका तर्फबाट दोस्रो चरणको काम पनि शीघ्र अघि बढाइने जानकारी दिएका छन्। नेपाल प्रिमियर लिग (एनपिएल) सञ्चालन हुनु अघि आवश्यक सबै तयारी पूरा गर्न उनले सम्बन्धित निकायलाई निर्देशन दिए।

मन्त्री घिसिङले थपे, ‘यो नयाँ स्टेडियम नेपालको पहिलो प्राथमिकता हो। खेल क्षेत्रका अन्य पूर्वाधारहरू पनि हामीले समान प्राथमिकतामा राखेर विकास गर्नुपर्नेछ।’

गत फागुनदेखि टियु मैदानमा प्यारापिटमा कुर्सी जडान र फ्लडलाइट निर्माण कार्य भइरहेको छ। २० फागुनमा सुरु भएको यो काम वैशाख २४ गते भित्र सक्ने योजना भए पनि निर्धारित समयमा पूरा हुन सकेन। अहिले समय थप गरेर निर्माण कार्यलाई तीव्रता दिइएको छ।

पहिलो चरणमा १० हजार क्षमताको सिट जडान भैसकेको छ। नेपाल क्रिकेट संघ (क्यान) का सचिव पारस खड्काले मन्त्री घिसिङलाई निरीक्षण गराएका थिए।