मस्कट (हाम्रो खेलकुद)- नेपालले ओमानमा जारी आइसिसी पुरुष टि ट्वान्टी एसिया तथा इस्ट एसिया-प्यासिफिक छनोटको सुपर सिक्समा आज कतारसँग खेल्दैछ। खेल नेपाली समयअनुसार राति ८:४५ बजे सुरु हुनेछ।

हिजो नेपालले युएईलाई १ रनले हराएर सनसनी मच्चाएको थियो। अन्तिम ओभरमा नेपालले खेल आफ्नो पक्षमा पार्दै जारी छनोटमा अपराजित यात्रालाई कायमै राखेको छ।

आज यही सिलसिलालाई निरन्तरता दिएको खण्डमा नेपालको‌ लगातार दोस्रो र समग्रमा तेस्रो पटक विश्व कप खेल्ने संभावना बलियो हुनेछ।

नेपालको बलियो पक्ष अल राउन्ड प्रदर्शन गर्न सक्ने खेलाडी नै हुन्। जुन युएई विरूद्धको खेलमा पनि देखियो। फिल्डिङमा नेपाल सधैं चुस्त रहने गर्दछ छ। नेपालको ब्याटिङ मिडल अर्डरले प्रभावकारिता बढाउन आवश्यक छ। मिडल अर्डरबाट रन बन्न सकेको छैन।

नेपाल सुपर सिक्सको अंक तालिकामा ४ अंक सहित रन रेटको आधारमा दोस्रो स्थानमा छ। पहिलो स्थानमा रहेको ओमानको पनि ४ अंक नै रहेको छ।

सुपर सिक्समा कतारले ओमान सँगको पहिलो खेल गुमाएको थियो। कतारको लागि पनि आज जित्नै पर्ने दबाब रहेको छ। कतार अंक तालिकाको पाँचौं स्थानमा रहेको छ।

समूह चरणमा कतार युएईसँग ७ विकेटले पराजित भएको थियो। अर्को खेलमा मलेसियालाई ८ विकेटले हराएको थियो। यस्तै सुपर सिक्समा कतार ओमानसँग ३४ रनले हारेको थियो।

नेपाल र कतारबीच अहिलेसम्म ३ पटक टी-ट्वान्टी आईमा तीन पटक खेलेको छ। जसमा नेपालले २ खेल जित्दा १ खेल हारेको छ।