काठमाडौं (हाम्रो खेलकुद)- नेपालले तेस्रो पटक टि ट्वान्टी विश्वकपका लागि स्थान बनाएपछि नेपाल क्रिकेट संघ (क्यान) का सचिव पारस खड्काले खेलाडीलाई धन्यवाद दिँदै नेपालीलाई बधाई दिएका छन्।
ओमानको मस्कटमा जारी टि‌ ट्वान्टी एसिया तथा इस्ट एसिया-प्यासिफिक छनोटबाट नेपालले विश्वकपमा स्थान बनाएपछि खड्काले  सफलताको श्रेय खेलाडीको अथक मिहिनेतलाई दिएका छन्।
राष्ट्रिय टोलीका पूर्व कप्तान समेत रहेका खड्काले  भने, ‘यहाँसम्म पुग्न सबैभन्दा ठूलो योगदान खेलाडीको नै हो। उनीहरू नै नेपाली क्रिकेटका सबैभन्दा महत्वपूर्ण स्टेक होल्डर हुन्। खेलाडीको विकास, सेवा र सुविधालाई नै क्यानको प्रमुख प्राथमिकता हो।’
उनले क्यानले पछिल्ला वर्षहरूमा गरेको लगानीको नतिजा अब देखिन थालेको बताए। आगामी दिनमा अझै बढी लगानी र योजनाबद्ध तयारीले नेपाली क्रिकेटलाई नयाँ उचाइमा पुर्‍याउने खड्काले बताए।

हाम्रो खेलकुद डटकमसँग कुराकानी गर्दै उनले भने, ‘विश्वकप सानोतिनो कुरा होइन। यो सबै नेपालीको गर्वको क्षण हो। सबैलाई बधाई दिन चाहन्छु।’
उनले यस यात्रामा नेपाल क्रिकेट संघ, युवा तथा खेलकुद मन्त्रालय र राष्ट्रिय खेलकुद परिषद्को निरन्तर सहयोगको पनि प्रशंसा गर्दै धन्यवाद दिएका छन्।
खड्काले खेलाडीलाई धेरै उत्साहित नहुन आग्रह गर्दै भने, ‘नेपाली क्रिकेटलाई अझ अगाडि पुर्‍याउने जिम्मेवारी यही टिमको काँधमा छ।’
खड्काको कप्तानीमा नेपालले पहिलो पटक सन् २०१४ मा टि ट्वान्टी विश्वकप खेलेको थियो। त्यसपछि २०२४ मा नेपाल विश्व कप खेलेको थियो।