काठमाडौं (हाम्रो खेलकुद)- क्लाउड फ्याक्ट्रीले
तेस्रो सिई कर्पोरेट टि-टेन इन्डोर क्रिकेट प्रतियोगिताको उपाधि जितेको छ।

बुढानिलकण्ठको चुनिखेल स्थित रोयल स्पोर्ट्स पार्कमा शनिवार राति भएको फाइनलमा क्लाउडले राष्ट्रिय बाणिज्य बैंकलाई ५ विकेटले पराजित गर्दै उपाधि जितेको हो  ।

७३ रनको लक्ष्य क्लाउड फ्याक्ट्रीले १ बल बाँकी हुँदा ३ विकेट गुमाएर भेटायो।

टोलीका ओपनर जुलेन महर्जनले सर्वाधिक २७ रन बनाए। यस्तै सुबोध ढुंगेलले १५ रन जोडे।‌चन्द्र कुमार राईले ११ र सबिन डिसीले ५ रनमस अविजित रहे।

त्यस अघि टस हारेर ब्याटिङ गरेको बाणिज्य बैंकले निर्धारित १० ओभरमा २ विकेट गुमाएर ७२ रन बनाएको थियो।

बाणिज्य बैंकको लागि ओपनर बिबेक श्रेष्ठले सर्वाधिक ३१ रन बनाए । कप्तान सुशील देवकोटाले अविजित २८ रन बनाए।

क्लाउड फ्याक्ट्रीले १ लाख १ हजार र बाणिज्य बैंकले ५० हजार ५ सय रुपैयाँ प्राप्त गर्यो।  क्लाउड फ्याक्ट्रीका सुबोध ढुंगेल प्रतियोगिताको सर्वोत्कृष्ट खेलाडी घोषित भए र उनले १० हजार रुपैयाँ पाए।

यस्तै सलिकोका स्पन्दन न्यौपाने उत्कृष्ट ब्याटर, सिद्धार्थ बैंकका सन्जिब मदैया उत्कृष्ट बलर , सिद्धार्थ बैंकका ब्रिज नन्दन तिवारी उत्कृष्ट विकेटकिपर घोषित भए र उनीहरुले समान ५ हजार रुपैयाँ पाए।

मस्ट चियर्ड टिमको अवार्ड एनएलजी इन्सुरेन्सले, फेयर प्ले टिमको अवार्ड हिमालयन एभरेष्ट इन्सुरेन्सले र इनर्जेटिक टिमको अवार्ड सानिमा जिआईसी इन्सुरेन्सले प्राप्त गर्यो।

सिई कन्स्ट्रक्सनको आयोजना र चित्रा स्पोर्ट्सको सहकार्यमा दुई दिन चलेको प्रतियोगितामा १२ कर्पोरेट टोलीको सहभागिता थियो।