काठमाडौं (हाम्रो खेलकुद)- निरज कुमार यादवको शतकमा एसिसी पुरुष यु–१९ प्रिमियर कपमा विजयी सुरुवात गरेको छ।

नेपालले संयुक्त अरब इमिरेट्स (युएई) को अजमानस्थित करवान ग्रुप मैदानमा आज भएको उद्घाटन खेलमा साउदी अरबियालाई ८ विकेटले हराएको छ।

जितको लागि २ सय १९ रनको लक्ष्य नेपालले ३०.४ ओभरमा २ विकेटको नोक्सानीमा पूरा गर्यो। ओपनर निरज र वंश क्षेत्रीले पहिलो विकेटको लागि ६३ रनको साझेदारी गर्दै राम्रो सुरूवात दिलाए।

छैटौं ओभरको पाँचौं बलमा मोहम्मद जुबेर सुनसाराको बलमा वंश ३० रनमा आउट भए।‌ उनले २० बल खेल्दै ४ चौका र १ छक्का प्रहार गरे।

त्यसपछि निरज र निश्चल क्षेत्रीले दोस्रो विकेटका लागि १५५ रनको साझेदारी गर्दै टोलीलाई जित नजिक पुर्‍याए। स्कोर बराबरी भएको अवस्थामा निरज ३१औँ ओभरमा हाशिर अहमद सज्जादद्वारा बोल्ड आउट भए। उनले ९० बलमा १३ चौका र एक छक्कासहित १ सय १४ रनको सानदार शतकीय पारी खेले।

निश्चलले ७३ बलमा पाँच चौका र एक छक्कासहित ६६ रनमा अविजित रहे। सिब्रिन श्रेष्ठले सामना गरेको पहिलो बलमै एक रन जोडेर नेपाललाई जित दिलाए।

त्यसअघि पहिले ब्याटिङ गरेको साउदीले ५० ओभरमा ९ विकेट गुमाउँदै २ सय १८ रन बनाएको थियो। मोहम्मद जुबेर सुनसाराले ७६ बलमा ३ चौका र १ छक्कासहित सर्वाधिक ४८ रन बनाए।

मोहम्मद रेहान सिद्दीकीले ५९ बलमा ३ चौकासहित ४१ रन जोडे। ओमै अहमद वहाबले ३७ बलमा ३ चौका र ३ छक्कासहित ३९ रन बनाएका थिए।

बलिङमा अशोक धामीले २ विकेट लिए। दर्श सोनार, सिब्रिन श्रेष्ठ, सुशील बहादुर रावल र दयानन्द मण्डलले समान एक विकेट झारे। नेपालले दोस्रो खेल बिहीबार हङकङसँग खेल्नेछ।