काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा अहिले विराटनगर किंग्स र कर्णाली याक्सबीच खेल हुँदैछ। टस जितेर कर्णालीले पहिला ब्याटिङ गर्ने भएको छ।

विराटनगरको यो पाँचौं खेल हो। उसले ४ खेलबाट ६ अंक बनाएको छ। विराटनगर पछिल्लो खेलमा चितवनसँग ४८ रनले हारेको थियो।

लगातार ३ खेल जितेको विराटनगरलाई चितवनले पहिलो हार चखाएको थियो। त्यसअघि भने विराटनगरले जनकपुर बोल्ट्सलाई ९ विकेटले, काठमाडौं गोर्खाजलाई ५ विकेटले र पोखरा एभेन्जर्सलाई ५३ रनले हराएको थियो।

कर्णालीको यो चौथो खेल हो। पछिल्लो खेलमा
कर्णाली सुदूरपश्चिम रोयलसँग ४५ रनले हारेको थियो। जहाँ कर्णाली ९४ रनमा समेटिएको थियो। त्यसेैले कर्णाली आज ब्याटिङमा सजक रहनुपर्नेछ। कर्णाली चितवनसँग ४ विकेटले हारेको थियो । लुम्बिनीलाई ९ विकेटले हराएको थियो। कर्णालीसँग २ अंक छ।

कर्णालीले आज प्लेइङ ११ मा १ र विराटनगरले ३ खेलाडी परिवर्तन गरेको छ। कर्णालीका अर्जुन घर्तीको स्थानमा दीपक डुन्रेलाई स्थान दिइएको छ।

विराटनगरका सूर्य तामाङ, नरेन भट्ट र शुभम रञ्जानेको स्थानमा साहिल पटेल, सुबाश भण्डारीको‌ स्थानमा सेहान जय सूर्यालाई खेलाइएको छ।

यसअघि आज पहिलो खेलमा काठमाडौं तेस्रो जितका साथ अंक तालिकाको तेस्रो स्थानमा उक्लिएको छ। काठमाडौंले चितवन राइनोजलाई ५३ रनले ले हरायो।