काठमाडौं (हाम्रो खेलकुद)- एसिसी पुरुष यू-१९ प्रिमियर कपको फाइनलमा युएईले नेपाललाई जितको लागि १ सय ४८ रनको चुनौती दिएको छ।

अजमानको कारवान ग्राउन्डमा भएको खेलमा नेपालले टस जितेर बलिङ रोज्यो। पहिले ब्याटिङ गरेको युएईले निर्धारित ५० ओभरको खेलमा ४५.५ मा अल आउट हुँदै १ सय ४७ रन बनायो।

दयानन्द मण्डलले पहिलो ४ विकेट लिंदै युएई विरूद्ध नेपालले उत्कृष्ट सुरुवात गर्यो। ओपनर तथा कप्तान यायिन राय दयानन्दको बलमा रोयल आउट भए। लगत्तै ५ रन बनाएका जानुउल्लाह रेहमानीलाई पनि दयानन्दले नै एलबिडब्लु धरापमा पारे।

५ रन बनाउँदा २ विकेट गुमाएको युएईले सातौं ओभरमा थप दुई विकेट गुमायो। सातौं ओभरको दोस्रो बलमा ओपनर आयान मिसबाह र यही ओभरको पाँचौं बलमा मुहम्मद रायन खानलाई दयानन्दले पबिलियनको बाटो देखाइदिए। आयानले ११ रन बनाउँदा मुहम्मदले रनको खाता खोल्न सकेका थिएनन्।

पाँचौं विकेटको रुपमा पृथ्वी मधु ४ रनमा अशोक धामीद्वारा बोल्ड आउट भए। यसपछि अहमद खुदादत र नोरउल्लाह अबोयीले छैठौं विकेटका लागि ५६ रनको साझेदारी गरे। नोरउल्लाह २६ रन जोडेर अपराजित पौडेलको बलमा आउट भए। ३१.४ ओभरमा युएईले १ सय रन जोडेको थियो।

लगत्तै ७ रन बानएका उद्दिश सुनलाई पनि अपराजितले नै आउट गरे। आठौं विकेटको रूपमा सालेह अमिन ५ रनमा आउट भए।

क्रिजमा जमेका अहमद खुदादतले १ सय २६ बल खेल्दै ६ चौका सहित ७१ रनको उत्कृष्ट पारी खेले।‌ उनलाई पनि दयानन्दले नै आउट गरे।

बलिङमा दयानन्द नायक बने। उनले ६ ओभर ५ बए बलिङ गर्दै मात्र १७ रन दिएर ६ विकेट लिए। अपराजितले २ विकेट आफ्नो नाममा लेखाए।

नेपाल अपराजित रहँदै प्रतियोगिताको फाइनलमा पुगेको हो।