काठमाडौं (हाम्रो खेलकुद) – नेपाली राष्ट्रिय क्रिकेट टोलीका सदस्य सन्दीप लामिछाने विश्व क्रिकेटको प्रतिष्ठित इन्डियन प्रिमियर लिग (आईपीएल) को अक्सनमा सहभागी हुँदै छन् । सन्दीप अक्सनमा सहभागी हुने पहिलो नेपाली खेलाडी हुन् । अक्सन स्टार स्पोर्ट्समा प्रत्यक्ष प्रसारण हुनेछ ।
भारतका आठ फ्रेन्चाइजले सहभागिता जनाउने यस ट्वान्टी-२० लिगमा सहभागिता जनाउन विश्वका उत्कृष्ट खेलाडीहरुको चाहना हुन्छ । तर अक्सनमार्फत कुनै टोलीले खरिद गरेका खेलाडीले मात्र यसमा सहभागिता जनाउने मौका पाउँछन् । प्रत्यक टोलीले कम्तिमा १८ र बढीमा २५ खेलाडी अक्सनमार्फत किन्न पाउने प्रावधान रहेको छ । प्रत्येक टोलीमा अधिकतम ८ विदेशी खेलाडी राख्न पाइन्छ भने एक पटकमा ४ खेलाडीले मात्र खेल्न पाउँछन् ।
अक्सनमा सहभागी हुन आईपीएलले ५ सय ७८ खेलाडीको अन्तिम नामावाली सार्वजनिक गरेको छ । त्यसमा ३ सय ६० भारतीय तथा २ सय १८ विदेशी खेलाडी रहेका छन् । सबै टोलीलाई अक्सनमा खर्च गर्न ८० करोड भारु तोकिएको छ । केही टोलीले भने प्रतियोगिताको नियमअनुसार पुराना खेलाडी राख्ने प्रक्रिया (रिटेन्सन) को उपयोग गरेकाले केही सिमित बजेट खर्चिन पाउने छैनन् ।
नेपालको क्रिकेट इतिहासमै सन्दिप ईपीएलको अक्सनमा पर्ने पहिलो खेलाडी हुन् । सन्दिपको न्युनतम सुरुआती मूल्य २० लाख भारु राखिएको छ । आईपीएलको अक्सनको जानकारी यसप्रकारको रहेको छ :
अक्सन हुने मिति : २७ र २८ जनवरी २०१८
अक्सन हुने स्थान : रिट्ज कार्ल्टन, बेंग्लोर
अक्सन समय : बिहान ९ बजेदेखि
प्रत्यक्ष प्रसारण : स्टार स्पोर्ट्स र हटस्टार एप
