काठमाडौं (हाम्रो खेलकुद) – आइसीसी विश्व कप छनोटमा अभ्यासरत नेपाल क्रिकेट टोलीको हङकङ विरुद्धको दोस्रो अभ्यास खेल वर्षा तथा चिसो मैदानका कारण रद्द भएको छ ।
नेपालले पहिलो अभ्यास खेलमा युएईलाई ५ विकेटले पराजित गरेको थियो । अब नेपालले विश्वकप छनोटको आफ्नो पहिलो खेल मार्च ४ मा घरेलु टोली जिम्बावेसँग खेल्ने छ । डिभिजन-२ मा उपविजेता रहँदै नेपाल विश्वकप छनोटको समूह ‘बि’ मा परेको हो ।
समूह ‘बि’ मा नेपालले अफगानिस्तान, जिम्बावे, हङकङ र स्कटल्याण्डसँग प्रतिस्पर्धा गर्ने छ । विश्वकप छनोटमा रहेका १० टोली मध्ये शीर्ष दुई टोली विश्वकप छनोटमा प्रवेश गर्ने छन् । डिभिजन-२ मा उत्कृष्ट प्रदर्शन गरेको टोलीलाई नेपालले यथावत राख्दै ललित नारायण राजवंशीको रुपमा एक खेलाडी थप पनि गरेको छ ।
