काठमाडौं (हाम्रो खेलकुद) – आइसीसी विश्वकप छनोट प्रतियोगिता २०१८ को पहिलो खेलमा नेपाल टेष्ट राष्ट्र जिम्बावेसँग १ सय १६ रनले पराजित भएको छ । ३ सय ८१ रनको लक्ष्य पछ्याएको नेपालले निर्धारित ५० ओभरमा ८ विकेटको क्षतिमा २ सय ६४ रन मात्र जोड्न सक्यो ।

तस्बिर: रमन सिवाकोटी

पराजित भए बावजुद नेपालको ब्याटिङ आज सन्तोषजनक रह्यो । नेपालका लागि शरद भेषावकर र आरिफ शेखले अर्धशतकीय पारी खेले । नेपालले ओपनर दिलिप नाथलाई दुई रनमै गुमाएपनि कप्तान पारस खड्काले ४० रन र उपकप्तान ज्ञानेन्द्र मल्लले ३२ रन जोड्दै तुलात्मक रुपमा राम्रो सुरुवात दिलाए ।

दिपेन्द्र सिंह ऐरी २३ रनमा आउट भए भने भरपर्दा ब्याट्सम्यान शरद भेषावकरले आज राम्रो ब्याटिङ गरे । ४८ बलमा ५२ रन जोड्दै उनले नेपाली पारीलाई गति दिएका थिए । शरदलाई आरिफ शेखले राम्रो साथ दिँदै पाँचौं विकेटका लागि यी दुईले ७३ रनको साझेदारी बनाए । आरिफले ५९ बलमा ५० रन जोड्दै धैर्यपूर्वक ब्याटिङ गरेका थिए । त्यस्तै रोहित पौडेल ३० रनमा आउट भए ।

यस अघि टस जितेर पहिले ब्याटिङ रोजेको जिम्बावेले निर्धारित ५० ओभरमा ६ विकेट गुमाई ३ रन ८० रन बनाएको थियो । जिम्बावेका लागि मिडलअर्डर ब्याट्सम्यानद्वय बेन्डन टेलर र शिकन्दर राजा दुवैले शतकीय पारी खेले ।

जिम्बावेका दुवै ओपनरले निकै विष्फोटक सुरुवात गरेका थिए । जिम्बावेको एक समय ७ ओभरमा विना क्षति ७७ रन थियो । तर बलिङ गर्न आएको पहिलो बलमै सन्दिप लामिछानेले सेफास झुवाओलाई आउट गर्दै नेपाललाई केही राहत दिलाएका थिए । झुवाओले २३ बलमा ४१ रन जोडे भने अर्का ओपनर सोलोमन मिरेले ४१ बलमा ५२ रन जोडेका थिए । तेस्रो नम्बरमा ब्याटिङ गर्न आएका ह्यामिल्टन मासाकाड्जाले १७ रन बनाएका थिए भने क्रेग एर्भिनले ३४ रनको पारी खेले । एर्भिनलाई आज डेब्यु गरिरहेका ललित राजवंशीले आउट गरेका थिए ।

३१ औं ओभरमा २०० रन हुँदा जिम्बावेको चौथो विकेट झर्दा नेपालले खेलमा पुनरागमन गर्ने संकेत दिएको थियो । तर अनुभवी ब्याट्सम्यान ब्रेन्डन टेलर र उच्च लयमा रहेका सिकन्दर राजाको बलियो साझेदारीमा जिम्बावेले नेपाललाई विशाल लक्ष्य दिन सफल भएको थियो । राजाले ६६ बलमा ९ छक्का प्रहार गर्दै १ सय २३ रन बनाए भने टेलरले ९१ बलमा १०० रनको योग्दान दिएका थिए । राजा र टेलरलाई ४९ औं ओभरमा सोमपाल कामीले लगातार आउट गरेका थिए ।

सामान्यतया कसिलो बलिङ गर्ने नेपालका बलरहरु आज निकै खर्चिलो सावित भएका थिए । नेपालका लागि वसन्त रेग्मी र सोमपालले दुई विकेट लिए भने सन्दिप लामिछाने र ललित राजवंशीले एकएक विकेट हात पारे । नेपालले आफ्नो दोस्रो खेलमा मार्च ८ मा स्कटल्यान्डको सामना गर्ने छ ।