काठमाडौं (हाम्रो खेलकुद) – जारी आइसीसी विश्वकप छनोट प्रतियोगिता २०१८ को दोस्रो खेलमा नेपाल आज स्कटल्यान्डसँग भिड्दै छ । टस जितेर पहिले ब्याटिङ रोजेको नेपालले ४७ ओभर ४ बलमा अलआउट हुँदै १ सय ४९ रन जोडेको छ ।
तस्बिर: रमन सिवाकोटी
नेपालको ब्याटिङ आज निकै फितलो देखियो । नेपालका शीर्षक्रमका ब्याट्सम्यानमध्ये कप्तान पारस खड्का मात्र क्रिजमा टिक्न सके । ७५ बलमा ९ चौकाको मद्दतले पारसले ६३ रन जोडे । ओपनरद्वय ज्ञानेन्द्र मल्ल र दिलिप नाथ तेस्रो ओभरभित्रै पभेलियन फर्केका थिए । ज्ञानेन्द्रले १ रन बनाए भने दिलिपले ४ रन जोडेका थिए । त्यस्तै दिपेन्द्र ऐरी १ रन, शरद भेषावकर शुन्य र आरिफ शेख २ रन बनाएर आउट भए ।
सोमपाल कामीले १८ रन, सन्दिप लामिछानेले ६ रन र रोहित पौडेलले १५ रन जोड्दै नेपालको पारीलाई केही राहत दिएका थिए । अन्त्यमा वसन्त रेग्मीले महत्त्वपूर्ण २२ रन जोड्दै स्कटल्यान्डलाई १ सय ५० को लक्ष्य दिन सहयोग दिए । स्कटल्यान्डका लागि स्टुवर्ट विटिङह्यामले ३ विकेट लिएका थिए । स्कटल्यान्ड अब केहि बेरमा ब्याटिङ गर्न उत्रिनेछ ।
