काठमाडौं (हाम्रो खेलकुद) – पोखरा प्रिमियर लिग (पिपिएल) टी–२० क्रिकेटमा ‘ओयो’ हस्पिटालिटी पार्टनर बनेको छ । पिपिएल आयोजक क्वीन्स इभेन्टस् म्यानेजमेन्टले शुक्रबार राजधानीमा पत्रकार सम्मेलनको आयोजना गर्दै ओयोलाई १ वर्षको लागि एक्सक्लुसिभ हस्पिटालिटी पार्टनरको रुपमा सम्झौता गरेको हो ।

सम्झौतमा ओयोका कन्ट्री प्रमुख निसिद हलानी र क्विन्सका प्रबन्ध निर्देशक छुम्बी लामाले हस्ताक्षर गरे । सम्झौताअनुसार ओयोले ३२ लाख रुपैयाँ बराबरको प्रायोजन पिपिएललाई उपलब्ध गराउने छ । ओयोले पोखरा प्रिमियर लिगमा सहभागी सम्पूर्ण टिम र आयोजकलाई आवासिय सुविधा उपलब्ध गराउने सम्झौता भएको छ ।

‘ओयो’ होटलहरुको मल्टिनेसनल कम्पनी हो । ओयोलाई दक्षिण एसियाकै ठुलो हस्पिटालिटी कम्पनीको रुपमा चिनिन्छ ।

सर्वाधिक धनराशाीको पिपिएल पर्यटकीय नगरी पोखरामा कात्र्तिक ९ गतेबाट २० गतेसम्म हुदैछ । लिगमा ६ टिमले प्रतिस्पर्धा गर्ने छन् । विराटनगर टाईटन्स, चितवन राईनोज, पोखरा पल्टन, बुटवल ब्लास्टर, काठमाडौं रोयल्स र एक्स्पर्ट धनगढी ब्लुज रहेका छन् ।

पिपिएल आयोजकले बिहिबार मात्रै टिम मालिक र मार्की खेलाडी सार्वजनिक गरेको थियो । पिपिएलका लागि १९७ खेलाडीबीच अक्सन हुने आयोजकले जनाएको छ ।