ढाका(एजेन्सी) – बंगलादेशमा जारी एसीसी यू–१९ एसिया कपमा लगातार दोस्रो खेलमा पराजित भएपछि नेपाल समुह चरणबाटै एक खेल अगाडीनै बाहिरिएको छ । आज भएको खेलमा अफगानिस्तानसँग ३ विकेटले पराजित भएपछि नेपालको सेमिफाइनल यात्राको ढोका बन्द भएको हो ।

समुह ‘ए’ बाट समान दुई खेल समान जीत निकाल्दै एक खेल अगाडी भारत र अफगानिस्तान सेमिफाइनल प्रवेश गरेका छन् । नेपाल र युएई समान दुई खेलमा जीत विहिन हुदैँ एक खेल अगाडीनै बाहिरिएका छन् । अव समुह विजेता र उप विजेताको लागि मंगलवार भारत र अफगानिस्तान भिड्ने छन् ।

मंगलबारनै नेपालले युएईसँग खेल्ने छ । यी दुईको खेल अव प्रतिष्ठाको लडाईमात्र हुने छ । नेपालले दिएको १ सय ३२ रनको सामान्य लक्ष्य अफगानिस्तानले ३७ ओभर ३ बलमा ७ विकेटको क्षतिमा पुरा गरेको हो । अफगानिस्तानलाई सहज जित दिलाउन अजमातुल्ला ओमरजीले उत्कृष्ट अलराउण्डर प्रर्दशन गरे ।

बलिङमा चार विकेट लिएका उनले ब्याटिङमा ३ छक्काको सहयोगमा ३० बलमा २३ रन बनाए । त्यस्तै आरिफ खानले २३ रन बनाए । पाँचौ विकेटका रुपमा ओमरजीलाई २४ ओभरमा सुर्य तामाङले आउट गरेपछि नेपाल खेलमा फर्किने संकेत देखाएको थियो । कुनै समय अफगानिस्तान २९ ओभरमा ११२ –६ को स्थितिमा पुगेको थियो ।

तर अफगानिस्तानलाई रोक्न १ सय ३२ रनको लक्ष्य प्रयाप्त भएन । त्यस्तै ओपनर तथा कप्तान रमानुल्लाह गुरबाज २६ ,रियाज हसन ११,इजाज अहमिद १६,बासिर खान ४, मोहमम्द इशाक ६ र अब्दुल रहमानले ८ रन बनाए । नेपालका लागि सुर्य तामाङले ४, पवन सरार्फ,रसिद खान र सागर ढकालले समान एक एक विकेट लिएपनि टोलीलाई हारबाट टार्न सकेनन् ।

यस अघि बिकेएसपी फोर मैदानमा टस जितेर पहिला ब्याटिङ गरेको नेपाल ३८ ओभर ३ बलमा अल आउट हुँदै मात्र १ सय ३१ रन बनाउन सकेको थियो । नेपालको आज पनि खराव सुरुवात रह्यो । पहिलो विकेटका रुपमा पाँचौ ओभरमा रवि कुमार शाह २ रनमा गुमाएको नेपालले दोस्रो विकेटका रुपमा ६.२ ओभरमा रित गौतम १० रनमा आउट भए ।

तेस्रो विकेटका रुपमा नवौ ओभरमा सन्दीप जोरा र ११ औं ओभरमा पवन सरार्फ समान ० रनमा पेभिलिएन फर्किएपछि नेपाल २१– ४ को कमजोर स्थितिमा पुगेको थियो । पाँचौ विकेटका लागि कप्तान आसिफ शेख र रोहित कुमार पौडेलले ८३ बलमा ५३ रनको साझेदारी गर्दै नेपाललाई २५ ओभरमा ७४– ५ को स्थितिमा पर्याउदै सम्मानजक स्थितीमा पुर्याउने प्रयास गरे ।

शेख २४.२ ओभरमा नविद मोहमम्द कबिरले ब्यक्तिगत २० रनमा शेखलाई पेभिलिएनको बाटो देखाएका थिए । त्यसपछि पनि नेपालको विकेट पतन जारी रह्यो । नेपालको विकेटमा गई रहेको पहिरो रोकिने कुनै संकेत देखिएन । नेपाल २८ ओभर ३ बलमा ८१–७ को दयनिय स्थितीमा पुगि सकेको थियो ।

सातौं विकेटका लागि रसिद र रोहितले ४० बलमा ३८ रनको महत्वपूर्ण साझेदारी गर्दै नेपाललाई सम्मान जनक स्थितिमा पुयाए । आक्रमक ब्याटिङ गरेका रसिदले २५ बलमा ५ चौका र १ छक्का प्रहार गर्दै ३० रनमा आउट भए । एक तर्फबाट धैर्यताकासाथ ब्याटिङ गरि रहेका रोहितलाई अर्को तर्फबाट टिकेर साथ कुनैपनि ब्याटम्यानले दिन सकेनन् ।

नवौं विकेटका रुपमा आउट भएका रोहितले ८८ बलमा ७ चौकाको सहयोगमा ४६ रन बनाए । नेपाली ब्याटिङलाई धरासायी बनाउदैँ अफगानिस्तानलाई सेमिफाइन सम्म पुर्याउन अजमातुल्ला ओमरजीले ९ ओभरमा ४ मेडन राखेर १४ रन खर्चदैँ ४ विकेट लिए । त्यस्तै क्यूआइस अहमद कमवाल,अब्दुल रहमानले समान दुई विकेट लिदाँ रिजनउल्लाह र नविद मोहमम्द कबिरले समान एक विकेट लिए ।