काठमाडौं (हाम्रो खेलकुद) – मलेसियामा आज आइसीसी टि ट्वान्टी उप क्षेत्रिय क्रिकेट छनोट प्रतियोगिता सुरु हुँदैछ । म्यानमारसँग खेल्दै नेपालले छनोटको यात्रा सुरु गर्दैछ । नेपाल र म्यानमारबीचको खेल आज दिउँसो १२ः१५ बजे बायोमास ओभर क्रिकेट मैदानमा सुरु हुने छ ।

नेपाल भन्दा तुलानात्मक रुपमा धरै कमजोर टोली म्यानमारसँग भिड्नु अघि नेपालको सोच फराकिलो अन्तरको जित,नयाँ कीर्तिमान र सुखद सुरुवात गर्ने हुने छ । यस अघि म्यानमारमाथि नेपालले दुर्लभ कीर्तिमान बनाएको छ । त्यो हो २ बलमा नै खेल जितेको ।

सन् २००६ मा एसिसि ट्रफीमा म्यानमार ११ रनमा नै अल आउट भएको थियो । जुन लक्ष्य नेपालले दुई बलमा पुरा गर्दै दुर्लभ कीर्तिमान बनाएको थियो । जुन रेकर्ड तोडिन असम्भव जस्तै छ । मलेसियामा नै एक महिना अघि खराब प्रर्दशन गर्दै एसिया कप छनोटमा चौथो भएको नेपालले क्रिकेटका पावर हाउस भारत र पाकिस्तानसँग खेल्ने अवसर गुमाएको थियो । त्यो खराब प्रदर्शनलाई भुल्दै यसपटक सुखद सुरुवात नेपाली टोलीको लक्ष्य हुनेछ ।

नेपालको विश्वकप यात्रा सुरु

२०२० मा अष्टेलियामा आयोजना हुने टि ट्वान्टी कपको लागि नेपालको यात्रा आजबाट सुरु भएको छ । उप–क्षेत्रिय छनोट खेल्दै विश्वकपको यात्रा सुर भएको हो । यो यात्रा विश्वकपमा परिणत हुन्छ वा बीचमै रोकिन्छ त्यो नेपालको प्रर्दशनमा भरपर्ने छ ।

प्रतियोगितामा नेपाल सहित आयोजक मलेसिया,चीन,थाइल्यान्ड,भुटान,सिंगापुर र म्यानमार रहेका छन् । यी सबै टोली एक अर्कासँग खेल्ने छन् । यसमा शीर्ष ३ मा पर्ने टोली एसियाली क्षेत्रिय छनोटको लागि छनोट हुने छन् । जस्मा पुर्वी र पश्चिम क्षेत्रबाट आएका शीर्ष तीन तीन टोली क्षेत्रिय छनोट प्रतियोगिता खेल्न पाउने छन् ।

पूर्वी क्षेत्र अहिले नेपाल खेली रहेको हो भने पश्चिम क्षेत्रबाट युएई,कतार र कुवेत छनोट भई सकेका छन् । क्षेत्रिय छनोट प्रतियोगिताबाट विजेता र उप विजेता टोली ग्लोबल छनोट प्रतियोगिताको लागि टिकट पाउने छन् । ग्लोबल छनोट अर्थात विश्वकप छनोटमा विभिन्न क्षेत्रबाट आएका १४ टोली रहने छन् ।

यी १४ देश मध्य शीर्ष ६ मा स्थानमा बनाउने टोलीले अष्ट्रेलियामा टि ट्वान्टी विश्व कप खेल्नेछन् । विभिन्न चरण पार गर्दै ग्लोबल छनोटमा नेपाल शीर्ष ६ भित्र पर्न सके दोस्रो पटक टी-२० विश्वकपको लागि टिकट पाउने छ । नेपाल यस अघि पहिलो पटक २०१४ मा बंगलादेशमा भएको टि ट्वान्टी विश्व कप खेलेको थियो ।

संभावित ओपनिङ जोडी

सधै जसो कमजोर देखिने ब्याटिङ बलियो बनाउन नेपालले प्राय हरेक नयाँ प्रतियोगितामा ओपनिङ जोडी परिवर्तन गरि रहेको छ । परिवर्तन गरेपनि कुनै पनि जोडीले राम्रो साझेदारी गर्न भने सकेका छैनन् । यस प्रतियोगितामा पनि ओपनिङ जोडी परिवर्तन गर्ने सम्भावना छ । त्यस्तै एसिया कप छनोटमा सुवास खकुरेल र अनिल शाहले सुरुवात गरेका थिए ।

यस पटक सुवास टिममा छैनन् । उपकप्तान ज्ञानेन्द्र मल्लले ओपनिङमा रन बनाउन सकि रहेका छैनन् । धेरैले ज्ञानेन्द्रलाई ओपनिङमा भन्दा वान डाउन ठिक हुने बताउँदै आएका छन् । डीपीएलमा तेस्रो नम्बरमा नै ब्याटिङ गर्दै ज्ञानेन्द्र सर्वाधिक रन बनाउने खेलाडी बनेका थिए ।

यस पटक ओपनिङमा ३ बर्षपछि राष्ट्रिय टिममा कमब्याक गरेका प्रदीप ऐरी र अनिलले गर्ने संभावना छ । त्यस्तै पछिल्लो समय घरेलु टि ट्वान्टी क्रिकेटमा ओपनिङ गर्नै आएका विस्फोटक ब्याटिङ गर्ने विनोद भण्डारी र प्रदीपले ओपनिङल गर्ने सम्भावना पनि छ ।

सोमपाल कामी

उपाधिको प्रमुख दाबेदार
नेपालको लक्ष्य उप क्षेत्रिय छनोटको उपाधि जित्नु हो । नेपाललाई उपाधिको दाबेदारका रुपमा हेरिएको छ । शीर्ष ३ मा पर्नु नेपालका लागि कठिन नहुने अनुमान गरिएको छ । सहभागी टोली नेपाल भन्दा कमजोर मानिन्छन् । कतिपयले त नेपालले यसमा कीर्तिमान बनाउन सक्ने सम्भावना रहेको पनि बताएका छन् । यो छनोटमा प्रतियोगितामा नेपाल मात्र वान डे र टि ट्वान्टी मान्यता प्राप्त राष्ट्र हो ।

खेल तालिका
नेपालले दोस्रो खेल आयोजक मलेसियासँग अक्टोबर ६ मा खेल्ने छ । तेस्रो खेल अक्टोबर ७ मा थाइल्याण्डसँग, चौथो खेल अक्टोबर ९ मा भुटानसँग ,पाँचौ खेल अक्टोबर १० चीनसँग र छैठौँ तथा अन्तिम खेल अक्टोबर १२ मा सिंगापुरसँग खेल्ने छ ।

नेपाली टोली : पारस खड्का (कप्तान), ज्ञानेन्द्र मल्ल (उपकप्तान), अनिल कुमार साह,बसन्त रेग्मी,बिनोद भण्डारी,दिपेन्द्र सिंह ऐरी,करन केसी,ललित भण्डारी ,ललितनारायण राजबंशी,मोहमम्द आरिफ शेख,प्रदिप ऐरी,सन्दीप लामिछाने,शरद भेसावकर,सोमपाल कामी

प्रशिक्षक : जगत टमाटा, व्यबस्थापक :रमन शिवाकोटी, फिजियो : दिनेश भट्ट