सुबास हुमागाईं, दुबई

नेपालले यूएईलाई टि-२० सिरिजको तेस्रो खेलमा १४ रनले पराजित गर्दा खेलको मुख्य आधार उपकप्तान ज्ञानेन्द्र मल्लको उत्कृष्ट फिल्डीङ रहयो । ज्ञानेन्द्रले खेलमा तीन शानदार क्याच लिँदै नेपालको जित पक्का गरेका थिए ।

उनले लिएका तीनै क्याच दर्शनीय थिए । ज्ञानेन्द्रले आठौं ओभरको पहिलो बलमा शाइमान अनवरलाई क्याच लिँदै पेभेलियन फर्काए । २० बलमा ३० रन जोडेर खेलिरहेका शाइमानले करण केसीको बलमा गरेको लामो प्रहारलाई ज्ञानेन्द्रले लङ अनबाट कुद्दै अगाडीपट्टि डाइभ हानेर उत्कृष्ट क्याच लिए ।

नवौं ओभरको पाँचौ बलमा मोहमद बुटाले मिडविकेटतर्फ प्रहार गरेको लामो सटलाई पनि ज्ञानेन्द्रले बाउन्ड्रीनजिक उत्कृष्ट ढंगले समाउँदै नेपाललाई खेलमा कायम राखे । अन्तिम ओभरको पहिलो बलमा ज्ञानेन्द्रले लिएको क्याच भने सर्वोत्कृष्ट थियो । निकै लयमा रहेका सीपी रिजवानले सिधा बाउन्ड्रीतर्फ गरेको प्रहारलाई ज्ञानेन्द्रले लङ अनबाट कुद्दै बाउन्ड्री हुनलागेको स्थितिबाट डाइभ दिंदै एक हातले क्याच गरेका थिए ।

कप्तान पारस खड्का र ब्याटिङ कन्सल्टेन्ट उमेश पटवाल दुवैले खेलपछि बोल्ने क्रममा ज्ञानेन्द्रको क्याचको खुलेर प्रशंसा गरे । पटवालले त ज्ञानेन्द्रलाई खेलको ‘म्यान अफ द म्याच’ को हकदार नै रहेको बताए । उनका अनुसार ज्ञानेन्द्रसँग पटवालले आइतबार बिहानमात्र फिल्डीङले कसरी खेल जिताउन सकिन्छ भने विषयमा छलफल गरेको पनि बताए ।

‘आजको खेलमा मेरो लागि ज्ञानेन्द्र नै म्यान अफ द म्याच हुन् । आज विहान मात्र मैले ज्ञानेन्द्रसँग उसकै कोठामा लामो छलफल गरेको थिएँ । डेविड मिलरले १० रन मात्र जोडेको खेलमा फिल्डीङबाट म्यान अफ द म्याच जितेको उदाहरण दिएको थिएँ । खेलमा ज्ञानेन्द्रले जस्तो प्रदर्शन गरे, उनी नै खेलको म्यान अफ द म्याच हुन्,’ पटवालले भने ।

ज्ञानेन्द्रले लिएको क्याचका केहि तस्बिर र टोलीसँगको खुसियाली :

• 

• 

• 

• 

• 

• 

• 

• 

• 

•