एजेन्सी – अनुभवी ब्याट्सम्यान रोश टेलरले दोहोरो शतक प्रहार गरेपछि बंगलादेशसँगको दोस्रो टेस्टमा घरेलु टोली न्युजिल्यान्ड १२ रनको इनिङ अन्तरले विजयी भएको छ ।
टस हारेर पहिला ब्याटिङ थालेको बंगलादेशले पहिलो इनिङमा ६१ ओभरमा २ सय ११ रनमा समेटिएको थियो । जवाफी पहिलो इनिङमा न्युजिल्यान्डले ८४.५ ओभमा ४३२/६ को अवस्थामा पहिलो पाली समाप्त गरेको घोषणा गर्यो ।
न्युजिल्यान्डलाई विशाल योगफल तयार पार्न टेलरले २ सय १२ बलमा १९ चौका र ४ छक्का प्रहार गर्दै २ सय रनमा आउट भए । हेनरी निकोलसले १ सय ७ र कप्तान केन विलियम्सनले ७४ रनको योगदान दिए । बंगलादेशका अवु जायदले ३ र ताइजुल इस्लामले २ विकेट लिए ।
जवाफी दोस्रो इनिङ थालेको बंगलादेशले ५७ ओभरमा २ सय ९ रनमा अल आउट भएपछि इनिङ अन्तरले पराजित हुन पुग्यो। बंगलादेशका लागि मोहम्मदुल्लाहले ६७,मोहम्मद मिथुन ४७,सादमन इस्लाम २९ र साम्य सरकारले २८ रन बनाउन बाहेक अन्य कुनै पनि ब्याट्सम्यानले राम्रो प्रर्दशन गर्न सकेनन् ।
न्युजिल्यान्डका नील वैगनरले ५ र ट्रेन्ट बोल्टले ४ विकेट लिए । योसँगै न्युजिल्यान्डले तीन टेस्ट श्रृंखला एक खेल अगावै २-० ले जितेको छ । तेस्रो तथा अन्तिम टेस्ट आगमी १६ मार्च देखी सुरु हुने छ ।
