काठमाडौं (हाम्रो खेलकुद) – मकवानपुरले आठौं राष्ट्रिय खेलकुदको क्रिकेटअन्तर्गत प्रदेश ३ स्तरीय छनोट प्रतियोगिताको उपाधि जितेको छ ।

मंगलबार मुलपानी क्रिकेट मैदानमा भएको फाइनल खेलमा काठमाडौंलाई १९ रनले हराउँदै उपाधि जित्न सफल भएको हो । १ सय ५५ रनको लक्ष्य पछ्याएको काठमाडौंले निर्धारित २० ओभरमा ६ विकेट गुमाउँदै १ सय ३५ रन बनायो । काठमाडौंका लागि रोविन जोशीले २५, ईशान पाण्डेले ३४, जितेन्द्रसिंह ठकुरीले ३०, भुपेन्द्र थापा १० रनमा आउट हुँदा शरद खड्का १२ र अभिनास अधिकारी ५ रनमा नट आउट रहे । मकवानपुरका लागि असिम श्रेष्ठ २,राम नरेश गिरी,रिजन ढकाल र राजिभ यादवले समान एक विकेट हात पारे ।

त्यस अघि टस जितेर पहिला ब्याटिङ थालेको मकवानपुरले निर्धारित २० ओभरमा ९ विकेट गुमउँदै १ सय ५४ रन बनाएको थियो । मकवानपुरका लागि सुमन सुनारले ४४, रिजन ढकाल २६ र राजन यादवले १८ रन बनाए । काठमाडौंका लागि जितेन्द्रसिंह ठकुरीले ३, ईशान पान्डे, अभिनास अघिकारी, दिपक बोहोरा र शरद खड्काले समान एक विकेट आफ्नो नाममा लेखाए ।

विजेता टोलीले मेडल र प्रमाण पत्र पाए । फागुन २२ देखी सुरु भएको प्रतियोगितामा काठमाडौं, चितवन, नुवाकोट, भक्तपुर, मकवानपुर, काभ्रेपलान्चोक र ललितपुर गरि ७ जिल्लाको सहभागिता रहेको थियो ।

उप विजेतामा सिमीत भएपछि काठमाडौंका प्रशिक्षक सुनोज भट्टराईले ज्ञानेन्द्र मल्ल खेलेको भए उपाधि जित्न सक्ने बताए । ‘ज्ञानेन्द्र नहुँदा र हाम्रा तीन खेलाडी यू-१९ प्रशिक्षणमा जादा पनि हामी केहि कमजोर बन्यौ । मल्ल खेलेको भएपनि धेरै सहज हुन सक्थ्यो। प्रमुख ४ खेलाडी नहुँदा खेलको प्रर्दशनमा केहि असर पर्यो । तरपनि हामी बलियो नै थियौ । बीचमा ३,४ ओभरमा अलि बढि रन खर्चिदा हार्न पुग्यौं”, भट्टराईले हाम्रो खेलकुदसँग भने । त्यस्तै मल्ल नहुँदा खल्लो महसुस भएको बताए ।

किन खेलेनन् ज्ञानेन्द्र मल्ल ?

माघ १० मा धनगढी प्रिमियर लिग (डिपिएल) को दोस्रो क्वालिफायरमा महेन्द्रनगर युनाईटेडसँगको खेल बहिष्कार गरेको भन्दै टेक्नीकल कमिटीले मल्ललाई गत बिहिबार ४ खेलमा प्रतिबन्ध लगाएको थियो । जस अनुसार मल्लले सुरुवाती चार खेल खेल्न पाएनन् । तर सोमबार भएको सेमिफाइनल खेलमा काठमाडौंले ललितपुरलाई ४ विकेटले पराजित गयो । यसै सेमिफाइनलबाट मल्लको प्रतिबन्ध सकिएको थियो । मल्लले फाइनल खेल्ने आसा गरिएको थियो तर मल्लले पारिवारीक अस्वस्थताको कारण देखाउँदै फाइनल नखेल्ने बताएका थिए ।