एजेन्सी – अष्ट्रेलियासँगको पाँच वान डे सिरीज घरेलु टोली भारतले ३-२ गुमाएको छ । सुरुवाती दुई खेल जितेको भारतले पछिल्ला तीन खेलमा लगातार पराजित हुँदै घरेलु मैदानमा सिरीज गुमायो ।

बुधबार दिल्लीमा भएको अन्तिम तथा पाँचौ खेलमा अष्ट्रेलियासँग ३५ रनले हार्दै सिरीज गुमाउन पुग्यो । क्रिकेट ईतिहासमा पाँच वान डे श्रृखंलामा सुरुवाती दुई खेल जितेर लगातार तीन खेल हार्दै सिरीज गुमाएको भारतले पहिलो पटक हो । यो नतिजासँगै भारतीय क्रिकेट टिमका कप्तान विराट कोहलीको कप्तानीमाथि प्रश्न उठ्न थालेको छ । भारतीय पुर्व स्पिनर विशन सिंहले कोहलीको कप्तानीमाथि प्रश्न उठाउदै भनेका छन्, आधा कप्तान समेत रहेका विकेटकीपर महेन्द्रसिंह धोनीलाई आखिर दुई खेलमा विराटले किन आराम दिए ?

सिंहले भनेका छन्, ‘धोनी आधा कप्तान हुन्,धोनी टिममा नहुँदा विराट दुविधामा पर्ने गर्दछ,विराटको प्रर्दशनमा पनि कमजोर देखिन्छ । तरपनि मलाई अचम्म लागि रहेको छ की धोनीलाई अन्तिम दुई खेलमा विराटले किन आराम दिए ।’

‘हो, धोनी अब युवा छैनन् तर पनि धोनीको जोस, जाँगर र फुर्ती भने पहिलाको भन्दा कुनै कम छैन । अहिले पनि धोनीको टिममा धेरै आवश्यक छ । धोनीले खेलको दौरानमा राम्रो सल्लाह दिने गर्दछन्,खेलाडीले पनि राम्रो गर्ने गर्दछन् । यो नतिजाले भारतको भविष्यको संकेत भने राम्रो देखिदैन’,सिंहले भने ।

कप्तान विराट कोहलीले तेस्रो खेलमा भारत ३२ रनले पराजित भएपछि धोनीलाई आराम दिँदै युवा विकेटकीपर ऋषभ पन्तलाई अन्तिम दुई खेलमा मौका दिएका थिए । टी-२० सिरीज पनि भारतले २-० ले गुमाउन पुगेको थियो ।