भुपेन्द्र जिसी, काठमाडौं

नेपाली क्रिकेट टोलीले पछिल्लो समय अन्तर्राष्ट्रिय स्तरमा एक पछि अर्को सफलता हात पारिरहेको छ । जुन सफलताले क्रिकेट मात्र नभई सिंगो नेपाली खेलकुदमा नै उत्साह, उमंग र खुसी थपेको छ । पछिल्लो समयको सफलतासँगै खेलाडीहरुबीच टोलीमा स्थान बनाउन तीव्र प्रतिस्पर्धा छ । सबै खेलाडीको सपना राष्ट्रिय टोलीको जर्सीमा उत्रँदै अन्तर्राष्ट्रिय स्तरमा देशको लागि खेल्ने हुन्छ । तर त्यो सपना सबैको पुरा हुँदैन ।

उमेर समुह र घरेलु प्रतियोगितामा उत्कृष्ट प्रर्दशन गर्ने खेलाडी राष्ट्रिय टोलीसम्म पुग्ने गर्दछन् । नेपाल क्रिकेट संघ क्यान नभएको अवस्थामा पछिल्लो तीन वर्ष ईपीएल, डीपीएल, पीपीएल र पीएमकपको प्रर्दशनलाई आधार मानेर खेलाडी छनोट गरिंदै आएको छ । अहिले टिममा रहेका रोहित कुमार पौडेल, सन्दीप जोरा, पवन सरार्फ, ललित नारायण रावजंशी, अभिनाष बोहोरा त्यसका उदारण हुन् ।

मौका पाएको बेलामा उत्कृष्ट प्रर्दशन गर्ने खेलाडीले टोलीमा निरन्तरता पाउँदा आफूलाई प्रमाणित गर्न नसक्ने खेलाडीले अर्को पटक मौका पाउदैनन् । नेपालमा मात्र होइन विश्वमानै यसै गरि चल्ने गर्दछ । कुनै खेलाडीले खराव प्रर्दशन गर्दा वा सन्न्यास लिदा अर्को नयाँ खेलाडीको लागि बाटो खुल्ने गर्दछ । त्यो अवस्थामा उमेर समुह र घरेलु प्रतियोगितामा उत्कृष्ट प्रर्दशन गर्ने युवा खेलाडीले राष्ट्रिय टोलीमा उसको स्थान लिने गर्दछ । उत्कृष्ट प्रर्दशन गरेर मात्र हुँदैन त्यो खेलाडीको रोल(भुमिका) सिनियर टिममा आवश्यक छ वा छैन भन्नेमा पनि निर्भर रहन्छ ।

यो वर्ष नेपालले आईसीसी टी२० विश्वकप एसिया छनोट देखी आईसीसी विश्वकप लिग–२ जस्ता प्रतियोगिता खेल्ने तालिका सार्वजनिक भइसकेको छ । अन्य देशसँग सहकार्य गर्दै ओडआई र टी ट्वान्टी सिरिज खेल्न सक्छ तर निश्चित छैन । यो वर्ष नेपाली क्रिकेट टोली धेरै ब्यस्त रहने छ । ब्यस्त रहि रहँदा धेरै खेलाडीले राष्ट्रिय टोलीमा मौका पाउन सक्छन् । यी तीन युवा खेलाडी जसले यो वर्ष नेपाली राष्ट्रिय क्रिकेट टिममा डेब्यू गर्न सक्छन् ।

३. साहब आलम

साहब उमेर समुह हुँदै घरेलु लिगमा निरन्तर उत्कृष्ट प्रर्दशन गरि रहेका स्पिनर हुन् । घरेलु प्रतियोगितामा निरन्तर आफ्नो प्रभाव जमाइरहेका आलमले गत वैशाखमा सम्पन्न आठौं राष्ट्रिय खेलकुदमा त्रिभुवन आर्मीबाट प्रतिनिधित्व गर्दै उत्कृष्ट प्रर्दशन गरेका थिए । प्रदेश ३ विरुद्ध ४ ओभरमा ३ मेडन सहित २ रन खर्चेर ६ विकेट लिर्दै सनसनी मच्चाएका थिए ।

अन्तर्राष्ट्रिय क्रिकेटबाट शक्ति गौचनले सन्न्यास लिइसकेका छन् । वसन्त रेग्मिको ढल्किदो उमेरको असर विस्तारै प्रर्दशनमा पनि पर्न थालेको छ । नेपाली टोलीमा लेग स्पिनरको रुपमा अहिले सन्दीप लामिछाने छन् । निरन्तर उत्कृष्ट प्रर्दशन गरि रहेका सन्दीपको स्थान नेपाली टोलीमा निश्चित छ । त्यसैले अब सिनियर टिममा लेग स्पिनरलाई स्थान पाउन कठिन पनि देखिन्छ । तर आलम अफ स्पिनर हुन् । शक्तिको सन्याससँगै अफ स्पिनरको रुपमा एक स्पिनरले टोलीमा मौका पाउने छन् ।

नेपाली टोलीमा आलम राम्रो विकल्पका रुपमा देखिन्छन् । ईपीएलमा चितवन टाईगर्स, डीपीएल महेन्द्रनगर युनाईटेड र पीपीएल विराटनगर टाइटन्सबाट आलमले यस सिजन फ्रेन्चाइज लिग खेलेका थिए । अन्य घरेलु प्रतियोगिता भने उनले आर्मीबाट खेल्ने गर्दछन् । एक हप्तापछि काठमाडौंमा हुने प्रधानमन्त्री कप क्रिकेटमा आलम त्रिभुवन आर्मीबाट खेल्ने छन् । पीएम कपमा उत्कृष्ट प्रर्दशन गर्न सके आलमको लागि राष्ट्रिय टोली सहज बन्ने छ ।

२. कुशल मल्ल

१५ वर्षीय कुशल नेपाली क्रिकेटमा ठूलो सम्भावना बोकेका युवा अलराउन्डर हुन् । देब्रे (बाँया) हाते ब्याट्सम्यान तथा स्पिनर मल्लले छोटो समयैमा घरेलु क्रिकेटमा राम्रो छाप छोड्न सफल भएका छन् । यू१६ उमेर समुहबाट उदायका मल्ल गत मंसिरमा भैरहवा ग्ल्याडीयटर्सबाट नेपाली फ्रेन्चाइच लिगमा ईपीएलमा डेब्यू गरेका थिए । उनले चितवन टाईसर्गविरुद्ध १३ बलमा समान २ चौका र २ छक्का प्रहार गर्दै उत्कृष्ट २७ रनको अविजित पाली खेल्दै भैरहवाको हार टारेका थिए । डीपीएलमा मध्यम प्रर्दशन गर्दा एक महिना अघि यू१९ टोलीमा डेब्यू गर्दै आइसीसी एसिया छनोटमा उत्कृष्ट प्रर्दशन गरे ।

नेपाली टोली अहिले उत्कृष्ट अलराउन्डर फिनिसरको खोजिमा छ । गत माघमा अलराउन्डरको रुपमा नेपालले पवन सरार्फलाई टोलीमा मौका दिएको थियो । तर सरार्फले आसा गरे अनुसारको प्रर्दशन भने गर्न सकेनन् । यो अवस्थामा मल्ल सबैभन्दा सहि विकल्प सावित हुन सक्छन् ।

कुशल बायाँ हाते खेलाडी हुन् । नेपाली टोली बाँया हाते खेलाडीको अभाव पनि छ । यो भन्दा बढि उन्म प्रतिभा छ । उनलाई यो ओडीआई मान्यता अवधिमा अन्तर्राष्ट्रिय स्तरका लागि तयार पार्न सके नेपालले एक उत्कृष्ट अलरान्डर पाउनेछ । नेपाली टोलीको लागि लामो समय सम्म यो समस्या समधान हुन सक्छ । मल्ल पनि पीएम कपमा आर्मीबाट खेल्नेछन् ।

यो प्रतियोगितामा उत्कृष्ट प्रर्दशन गर्न सके उनलाई राष्ट्रिय टोली सहज बन्न सक्छ । आर्मीमा राष्ट्रिय टोलीका रोहित कुमार पौडेल, विनोद भण्डारी, भीम सार्की, सोमपाल कामी लगायतका खेलाडी हुँदा मल्ल छायाँमा पर्ने हुन् की भन्ने चिन्ता पनि छ ।

१. भीम सार्की

नेपाली जोन्टीको उप नामले चिनिने भिम सार्की मध्यक्रमका ब्याट्सम्यान हुन् । संयमित ब्याटिङसँगै उनले फिल्डिङबाट पनि टोलीलाईलाई जिताउन सक्ने क्षमता राख्छन् । नेपाली टोलीका प्रशिक्षक जगट टमटाका अनुसार भीम अहिले नेपाली क्रिकेटका नम्बर वान फिल्डर हुन् । उनले त्यो थुप्रै पटक प्रमाणित समेत गरेका छन् ।

डीपीएलमा गत फागुनमा रुपन्देही च्यालेन्जर्सबाट विराटनगरविद्ध असाद उल्लाह खानको अविश्वसनिय क्याच लिएपछि भिमको विश्वभरबाट वाहवाही भएको थियो । भीमले आफ्नो आदर्श मान्ने दक्षिण अफ्रिकी जोन्टी रोड्सले समेत उनको खुलेर प्रशंसा गरेका थिए ।

उमेर समुह र घरेलु क्रिकेटमा उत्कृष्ट निरन्तर प्रर्दशन गर्दै नेपाली राष्ट्रिय टोलीमा समेत स्थान बनाइसकेका छन् । गत माघमा यूएईसँगको ओडीआई र टी ट्वान्टी सिरिजको लागि भीम नेपालको १६ सदस्यीय टोलीमा परेका थिए । तर डेब्यू भने गर्न पाएनन् । भीमले पहिलो ओडीआईमै डेब्यू गर्ने अनुमान गरिएको थियो । तर सबैलाई आश्र्चय पार्दै भीम प्रतियोगिताभर बेन्चमा रहे ।

घरेलु क्रिकेट र उमेर समुहमा भीमले मध्यक्रम तथा तल्लो क्रममै भरपर्दो ब्याट्सम्यानको रुपमा आफूलाई स्थापित गरेका छन् । भीम टोलीको आवश्यकता अनुसार आक्रमक र रक्षात्मक दुवै खेल्न सक्छन् । भीमले स्पिन बलिङ पनि त्यतिकै राम्रो गर्दछन् । एक महिनाअघि सम्पन्न आईसीसी एसिया विश्वकप छनोट यू१९ मा मलेसियामा भीमले उत्कृष्ट पर्दशन गरेका थिए । दुर्भाग्य भन्नुपर्छ वर्षाको कारण डक वर्थ लेविसका आधारमा यूएईसँग १ रनले पराजित भएपछि नेपालको विश्वकप खेल्ने सपना अधुरै बनेको थियो ।

त्यसअघि गत कार्तिकमा भिमले पोखरा प्रिमियर लिगमा ५ खेलमा १ अर्ध शतक सहित १ सय २३ रन जोडेका थिए । त्यहि प्रर्दशन उनलाई सिनियर टिम सम्म ल्याउन सहज बनाएको थियो । ईपीएलमा चितवन टाईगर्सबाट खेलेपनि उनी अन्य खेलाडीको ओझेमा पर्दा आफ्नो क्षमता देखाउन पाएनन् ।

नेपाली टोली मिडिल अडर तथा तल्लोक्रममा भरपर्दो ब्याट्सम्यानको खोजिमा छ । यो अवस्थामा अहिले नेपाली टोलीको युवा खेलाडी हेर्दा हेर्दा भिम पहिलो राजाईको पर्दछन् । यो वर्ष अन्य खेलाडीको तुलनामा भिम सार्कीको डेब्यूको उच्च सम्भावना देखिन्छ । आगामी जेठ १० देखि प्रधानमन्त्री कप क्रिकेट हुँदैछ । भीम उक्त प्रतियोगितामा आर्मीबाट खेल्ने छन् । उत्कृष्ट प्रर्दशन गरेको खण्डमा भिमको लागि राष्ट्रिय टोलीमा डेब्यू झनै सहज हुने छ । पीएम कपमा खराव प्रर्दशननै गरेपनि ढिलो चाँडो भीमलाई नेपाली टोलीको जर्सीमा अन्तर्राष्ट्रिय खेलमा देखिने भने निश्चित छ ।

यसबाहेक तीव्र गतिका बलर राशिद खान र कमल सिंह ऐरीले अहिले घरेलु प्रतियोगितामा उत्कृष्ट प्रर्दशन गर्दै राष्ट्रिय टिममा मौका पाई रहेका छैनन् । कीनकि सिनियर टिममा सोमापाल कामी र करण केसीले निरन्तर उत्कृष्ट प्रर्दशन गरि रहदाँ उनीहरुलाई छायाँमा परेका हुन् । करण र सोमपालसँगै अभिनाश बोहोरा र ललितसिंह भण्डारी ब्याकअपको रुपमा रहेकाले कमल र राशिदले केहि समय कुर्नुपर्ने देखिन्छ ।