एजेन्सी – एकदिवसिय विश्वकप क्रिकेट २०१९ को उपाधि घरेलु टोली इंग्ल्यान्डले जितेको छ। फाइनल र सुपर ओभर पनि बराबर भएपछि आइतबार राती न्युजिल्यान्डलाई बाउन्ड्री काउन्ट अर्थात चौका छक्का धेरै प्रहार गरेको आधारमा पराजित गर्दै इंग्ल्यान्ड च्याम्पियन बनेको हो ।

यो विश्वकपमा सर्वाधिक रन बनाउने खेलाडी भारतीय टोलीका ओपनर रोहित शर्मा बने । रोहितले १० खेलमा ५ शतक सहित कुल ६ सय ४८ रन बटुले । त्यस्तै सर्वाधिक विकेट लिने खेलाडी अष्ट्रेलियाका मिचेल स्टार्क रहे । स्टार्कले १० खेलमा कुल २७ विकेट लिए । एकै खेलमा सर्वाधिक रन बनाउने अष्ट्रेलियाका ओपनर डेविड वार्नर बने । उनले बंगलादेशसँग १ सय ६६ रन जोडेका थिए । बलिङतर्फ पाकिस्तानका तीब्र गतिका युवा बलर शाहिन शाह अफ्रिदी रहे । उनले बंगलादेशविरुद्ध लिएको ६ विकेट एकै खेलको उत्कृष्ट प्रर्दशन रह्यो ।

विश्वकपमा इंग्ल्यान्डका जोफ्रा आर्चर, पाकिस्तानका शाहिन शाह अफ्रिदी, बंगलादेशका मुस्ताफिजुर रहमान जस्ता युवा खेलाडीले उत्कृष्ट प्रर्दशन गर्नुको साथै राम्रो प्रभाव छाडे । तर यस विश्वकपमा ठूला आसा र नाम गरेका थुप्रै स्टार खेलाडीको प्रर्दशन निराशजनक रह्यो । जसले आसा गरेको भन्दा निकै खराब प्रर्दशन गर्दै आफ्ना समर्थक र टोलीलाई निराश बनाए । यी पाँच फ्लप स्टार खेलाडी जसको विश्वकपमा प्रर्दशन यस्तो रह्यो ।

५. मार्कस स्टोइनस (अष्ट्रेलिया)

अष्ट्रेलियाका प्रमुख युवा अलराउण्डर मार्कस स्टोइनसको प्रर्दशन पनि सम्झन लायक रहेन । सन् २०१८ मा अष्ट्रेलियाको उत्कृष्ट क्रिकेट खेलाडी घोषित भएको उनले कुनै पनि खेलमा राम्रो प्रर्दशन गर्न सकेनन् । वेस्ट इन्डिज, भारत, बंगलादेश, इंग्ल्यान्ड, न्युजिल्यान्ड, दक्षिण अफ्रिका र सेमिफाइनलमा इंग्ल्यान्डसँग क्रमश : १९,डक,१७,८,२१,२२ र डक आउट भए । बलिङतर्फ स्टोइनिसले ७ विकेट लिए ।

४. ग्लेन म्याक्सवेल (अष्ट्रेलिया)

अष्ट्रेलियाका स्टार फिनिसर ग्लेन म्याक्सवेलको प्रर्दशन पनि राम्रो हुन सकेन । तल्लोक्रममा विश्फोटक ब्याटिङको आसा गरेपनि म्याक्सवेलले आफ्नो क्षमता अनुसार कुनै पनि खेलमा प्रर्दशन देखाउन सकेनन् । म्याक्सवेलले १० खेलमा १ सय ७७ रन मात्रै बनाउन सके । १९ चौका र ७ छक्का प्रहार गरेका उनले कुनै पनि खेलमा अर्ध शतक प्रहार गर्न सकेनन् । श्रीलंकासँगको खेलमा ४६ रननै उनको लागि यस विश्वकपमा बनाएको उच्च स्कोर हुन पुग्यो ।

३. मार्टिन गुप्टिल (न्युजिल्यान्ड)

न्युजिल्यान्डका विश्फोटक ओपनर मार्टिन गुप्टिलको प्रर्दशन पनि यस विश्वकपमा खराब रह्यो । न्युजिल्यान्ड फाइनलमा पुगेपनि उनले कुनै पनि खेलमा ठूलो इनिङ खेल्न सकेनन् । श्रीलंकासँग पहिलो खेलमा ७३ रनमा अविजित रहेका गुप्टिल त्यस बाहेक अन्य कुनै पनि खेलमा राम्रो प्रर्दशन गर्न सकेनन् । गुप्टिलले १० खेलमा १ सय ८६ रन बनाए । अफगानिस्तान र वेस्ट इन्डिजसँगको खेलमा डक आउट हुँदा उनले भारतसँगको सेमिफाइनल खेलमा १ रनमा पेभिलिएन फर्केका थिए ।

इंग्ल्यान्डसँगको फाइनल खेलमा १९ रनमात्रै जोडे । गुप्टिल कम्तिमा फाइनल खेलमा ठूलो इनिङ खेल्न सकेका भए न्युजिल्यान्ड विश्वकप च्याम्पियन बन्न सक्थ्यो। गुप्टिल सन् २०१५ को विश्वकपमा सर्वाधिक रन बनाउने खेलाडी हुन् । त्यसै विश्वकपमा वेस्ट इन्डिजसँगको खेलमा २ सय ३७ रनमा अविजित रहँदै गुप्टिलले नयाँ कीर्तिमान रचेका थिए। तर यस विश्वकपमा उनको प्रर्दशन निकै खराब रह्यो ।

२. फकार जमान (पाकिस्तान)

पाकिस्तानका ओपनर फकार जमानको प्रर्दशन पनि खराब रह्यो । सन् २०१७ को च्याम्पियनशीप ट्रर्फिमा फाइनलमा भारतबीरुद्ध शतक प्रहार पर्दै पाकिस्तानलाई उपाधि जिताउन नायक बनेका जमान वान डे क्रिकेटमा सर्वाधिक छिटो एक हजार रन पुरा गर्ने खेलाडी समेत हुन् । जमानले जिम्बाबेविरुद्ध दोहोरो शतक प्रहार गर्दै सनसनी मच्चाएका थिए । तर यस विश्वकपमा जमानले ८ खेलमा १ मात्रै अर्ध शतक सहित कुल १ सय ८६ रन मात्रै बनाउन सके ।

पाकिस्तानको विश्वकपमा ब्याटिङ कमजोर हुनुमा प्रखुम ब्याट्सम्यान जमानको खराब लय पनि पर्दछ। भारतसँगको खेलमा ६२ रन प्रहार गर्न बाहेक जमानले अन्य कुनै पनि खेलमा राम्रो प्रर्दशन गर्न सकेनन् । जमान अफगानिस्तान र अष्ट्रेलियासँगको खेलमा डक आउट भएका थिए ।

१. राशिद खान (अफगानिस्तान)

अफगानिस्तानका युवा लेग स्पिनर तथा नव नियुक्त कप्तान राशिद खानको प्रर्दशन सम्झन लायक रहेन । अन्तर्राष्ट्रिय क्रिकेटमा पछिल्लो समय आफ्नो दबदबाह राख्दै आएका उनीबाट उत्कृष्ट प्रर्दशनको आसा गरेपनि उनले ९ खेलमा ६ विकेटमात्रै लिन सके । इंग्ल्यान्डसँग राशिदले ९ ओभरमा १ सय १० रन खर्चिदै विश्वकपमा एकै खेलमा सर्वाधिक महँगो बलरको खराब रेकर्ड राखे ।

राशिदले श्रीलंकासँग २,वेस्ट इन्डिज,पाकिस्तान,अष्ट्रेलिया र भारतसँगको खेलमा समान १ विकेट लिन बाहेक अन्य कुनै पनि खेलमा विकेट लिन सकेनन् । प्रमुख खेलाडी राशिदको खराब प्रर्दशनकै कारण अफगानिस्तान विश्वकपमा जित बिहिन हुँदै घर फर्किनु पर्यो ।