सिंगापुर (हाम्रो खेलकुद) – आईसीसी टि-२० विश्वकपको ग्लोबल छनोटमा स्थान बनाउन नेपालले सिंगापुरमा जारी एसिया क्षेत्र छनोटको बाँकी दुबै खेल जित्नुपर्ने हुन्छ । शुक्रबारको दुवै नतिजा नेपालको आवश्यकता अनुसार आएपछि आगामी अक्टोबरमा यूएईमा हुने ग्लोबल छनोटका लागि नेपालको सम्भावना बढेको छ ।

पहिलो खेलमा कुवेतले कतारलाई १० रनले पराजित गर्दा दोस्रो खेलमा सिंगापुरले मलेसियालाई ८ विकेटले पराजित गर्यो । नेपालले शनिवार कुवेत र आईतबार सिंगापुरसँग प्रतिस्पर्धा गर्ने छ । दुबै खेलमा विजयी भए सोझैं ग्लोबल छनोटमा पुग्ने छ । आजको दुई नतिजाले नेपाललाई अब नेट रनरेटमा टाउको दुखाउन पर्ने छैन ।

नेपालले शनिवार कुवेतसँग खेल्ने छ । खेल नेपाली समय अनुसार विहान ७:१५ बाट सुरु हुने छ । प्रतियोगिताकै कमजोर मानिएको कुवेतले शुक्रबार कतारसँग उत्कृष्ट प्रर्दशन गर्दै आफुपनि अब्बल रहेको प्रमाणित गरेको छ । कतारविरुद्ध कुवेतले १ सय ९८ रनको विशाल योगफल तयार पारेको थियो । कुवेत ३ खेलमा समान १ मा जित र हारका साथ ३ अंक जोड्दै दोस्रो स्थानमा छ । एक खेल वर्षाको कारण रद्द भएको थियो । नेपाल २ खेलमा समान १ मा जित र हारका साथ तेस्रो स्थानमा छ ।

टी २० खेलमा एकै खेलाडीको प्रर्दशनले टोलीको हार र जित निर्धारण गर्न सक्छ । कुवेतका केहि यस्ता स्टार खेलाडी छन्, जसले आफ्नो उत्कृष्ट प्रर्दशनमा नेपालको विश्वकप खेल्ने सपना अधुरै बनाउन सक्छन् । कुवेतका यी ३ स्टार खेलाडी जसले आफ्नो उत्कृष्ट प्रर्दशनमा नेपाललाई अप्रत्याशित हार दिलाउन सक्छन् ।

३. इलायस अहमद (बलर)

२९ वर्षिय तीब्र गतिका बलर इलायस अहमद कुवेतबाट टी ट्वान्टी आईमा सर्वाधिक विकेट लिने खेलाडी हुन् । उनको ५ खेलमा ७.२१ को इकोनमीमा रन खचिदै ९ विकेट लिएका छन् । अहमदले झण्डै एक महिना अघि कतारसँगको ३ टी२० सिरिजमा ८ विकेट लिएका थिए । जारी प्रतियोगितामा कतारसँगको खेलमा विकेट विहीन बनेपनि मलेसियाविरुद्ध १ विकेट लिएका थिए ।

२. मोहम्मद काशिफ (अलराउण्डर)

३१ वर्षिय अलराउण्डर मोहम्मद काशिफ कुवेतका प्रमुख खेलाडी हुन् । उनी कुवेतबाट टी२० आईमा सर्वाधिक रन बनाउने सुचिमा तेस्रो र विकेटतर्फ दोस्रो स्थानमा पर्दछन् । उनले ८ टी २० आईमा २ अर्ध शतक सहित कुल १ सय ९३ रन जोडेका छन् । साथै ९ विकेट लिएका छन् । मलेसियासँगको खेलमा उनले ५१ रन जोड्नुको साथै १ विकेट लिएका थिए । तल्लोक्रममा ब्याटिङ गर्ने उनले अफ स्पिन बलिङ गर्ने गर्दछन् । उनले आफ्नो उत्कृष्ट अलराउण्डर प्रर्दशनमा नेपाललाई निराश बनाउन सक्छन् ।

१.राभिजा सन्दरवान (प्रमुख ब्याट्सम्यान)

२७ वर्षिय ओपनर राभिजा कुवेतका प्रमुख र भरपर्दा ब्याट्सम्यान हुन् । कुवेतबाट टी २० आईमा सर्वाधिक रन बनाउने खेलाडी समेत रहेका राभिजाले आफ्नो एक्लो प्रर्दशनमा नेपाललाई निराश बनाउन सक्छन् । उनले ९ टी २० मा १ शतक २ अर्ध शतक सहित कुल ३ सय ४३ रन जोडेका छन् । उनको स्ट्राइक रेट १७१.५० रहँदा २८ चौका र २४ छक्का सामेल छ ।

राभिजा ठूला सटका लागि परिचित छन् । कतारसँगको खेलमा २६ रनमा आउट हुँदा मलेसियासँग भने डक आउट हुन पुगे । उनी डक आउट हुनु कुवेतको हारको कारण बनेको थियो । उनले गत जनवरीमा बहराइनविरुद्ध ५९ बलमा १० चौका र ५ छक्का सहित १ सय ३ रनको उत्कृष्ट शतकीय इनिङ खेलेका थिए । त्यसैले उनि जति लामो समय क्रजमा टिक्छन् त्यतिनै नेपाललाई घातक बन्न सक्ने खेलाडी हुन् ।