सिंगापुर (हाम्रो खेलकुद) – नेपालले आईसीसी टी२० एसिया विश्वकप छनोट अन्तर्गत आईतबार निर्णायक खेलमा घरेलु टोली सिंगापुरसँग खेल्ने छ । यसै खेलको नतिजाले विश्वकपमा नेपालको भविष्य प्रष्ट पार्नेछ ।

नेपालले कुनै पनि प्रतियोगिता सहजै जितेको इतिहास बिरलै पाईन्छ । अधिकांश प्रतियोगिता नेट रनरेट र अन्य टोलीको नतिजामा निर्भर रहँदै आएको छ । कतारसँगको अप्रत्याशित हारपछि कप्तान पारस खड्काले पनि नेपालले हालसम्म सहजै कुनै पनि प्रतियोगिता नजितेको र उत्कृष्ट प्रर्दशन गर्दै ग्लोबल छनोटमा पुग्ने बताएका थिए । त्यसै अनुरुप नेपालले मलेसिया र कुवेतसँगको खेलमा उत्कृष्ट प्रर्दशन गर्दै ग्लोबल छनोट नजिक छ ।

आफ्नो पकडमा प्रतियोगिता आइसकेको अवस्थामा अब रनरेट र अन्य टोलीको नतिजा भन्दा पनि नेपाललाई वर्षाको चिन्ता छ । नेपाल विजयी भए आगमी अक्टोबरमा यूएईमा हुने ग्लोबल छनोटमा स्थान बनाउने छ । पराजित भए वा वर्षाको कारण अंक बाड्नु परे विश्वकप खेल्ने सपना समाप्त हुने छ ।

सिंगापुर ३ खेलमा २ मा जित सहित ५ अंक जोड्दै शीर्ष स्थानमा छ । वर्षाको कारण कुवेतसँग सिंगापुरले अंक बाडेंको थियो । नेपाल तीन खेलमा २ मा जित र १ मा हारका साथ ४ अंक जोड्दै दोस्रो स्थानमा रहेको छ ।

नेपाल र सिंगापुरबीचको खेल दुबैको लागि फाईनल सरह हुने छ । सिंगापुर नेपाल भन्दा तुलानात्मक रुपमा कमजोर टोली हो । तर नेपाललाई आफ्नो प्रर्दशन भन्दा पनि वर्षाको चिन्ता छ । भोली नेपाल र सिंगापुरबीच खेल हुने क्रममा वर्षा हुन सक्ने सम्भावना देखिन्छ । मौसम पूर्वानुमानका अनुसार खेलको अवधिमा स्थानीय समयानुसार ११ बजे हल्का वर्षाको सम्भावना रहेको छ ।

गत वर्ष मलेसियामा सम्पन्न एसिया क्वालिफायर बी को फाईनलमा पनि वर्षाको कारण नेपाल र सिंगापुरबीचको खेल रद्ध हुन पुगेको थियो । तर नेपाललाई उक्त रद्धले कुनै असर गरेन । नेपाल रन रेटका आधारमा च्याम्पियन बन्यो । भोली नेपालसँगको खेल वर्षाको कारण रद्ध भए पनि सिंगापुर पहिलो पटक ग्लोबल छनोटमा पुग्ने छ । आईसीसी टी२० वरीयतामा नेपाल ११ र सिंगापुर २३ औं स्थानमा छन् ।

नेपालको लागि कप्तान पारस खड्का,सन्दीप लामिछाने र सोमपाल कामीको प्रर्दशन महत्वपूर्ण रहने छ । अनन्थ कृष्ण,ओपनर सुरेन्द्रन चन्द्रमोहन,अम्जाद महबुब सिंगापुरका प्रमुख खेलाडी हुन् । कतारसँगको ४ विकेटको हारले नराम्रोसँग झस्किएको नेपालले उत्कृष्ट पुनरागमन गर्दै मलेसिया र कुवेतलाई समान ७ विकेटले पराजित गर्दै अघिल्लो चरणको संभावना बलियो बनाएको हो ।

मलेसियालाई पराजित गर्ने क्रममा ज्ञानेन्द्र मल्लले २० वलमा अर्ध शतक पुरा गरे । त्यस्तै कुवेतविरुद्ध पारसले ६८ रनको महत्वपूर्ण इनिङ खेले । शरद पनि राम्रो लयमा देखिएका छन् । बलिङतर्फ सबै खेलाडी राम्रो लयमा छन् । त्यसैले नेपाललाई आफ्नो प्रर्दशनको भन्दा पनि मौसमको बढी चिन्ता छ ।

भरपर्दा ब्याट्सम्यान शरद भेषवकरले आफ्नो क्षमताको ५०–६० प्रतिशत खलेपनि सहजै नेपालले सिंगापुरलाई हराउन सक्ने बताउछन् । तर मौसम आफ्नो हातमा नभएको बताउछन् ।