सिंगापुर (हाम्रो खेलकुद) – नेपालले आईसीसी टी२० एसिया विश्वकप छनोट अन्तर्गत आईतबार निर्णायक खेलमा घरेलु टोली सिंगापुरसँग खेल्नेछ । यसै खेलको नतिजाले विश्वकपमा नेपालको भविष्य प्रष्ट पार्नेछ ।

नेपाल विजयी भए आगमी अक्टोबरमा यूएईमा हुने ग्लोबल छनोटमा स्थान बनाउने छ । पराजित भए वा वर्षाको कारण अंक बाड्नु परे विश्वकप खेल्ने सपना समाप्त हुने छ । सिंगापुर ३ खेलमा २ मा जित सहित ५ अंक जोड्दै शीर्ष स्थानमा छ । वर्षाको कारण कुवेतसँग सिंगापुरले अंक बाडेंको थियो । नेपाल तीन खेलमा २ मा जित र १ मा हारका साथ ४ अंक जोड्दै दोस्रो स्थानमा रहेको छ । नेपाल र सिंगापुरबीचको खेल दुबैको लागि फाईनल सरह हुने छ ।

सिंगापुरलाई भन्दा अझ बढि दबाब नेपाललाई हुने छ । जारी प्रतियोगितामा सिंगापुरमात्रै अपराजित एक्लो टिम हो । सिंगापुरका तीन यस्ता खेलाडी छन् जसले आफ्नो उत्कृष्ट प्रर्दशनमा नेपाललाई निराश बनाउन सक्छन् ।

अम्जद महबुब (बलर)

महबुब सिंगापुरका अनुभवी बलर हुन् । ३८ वर्षिय महबुबले जारी आईसीसी टी २० एसिया विश्वकप छनोटमा उत्कृष्ट प्रर्दशन गरेका छन् । टी २० आईमा सिंगापुरबाट सर्वाधिक विकेट लिने खेलाडी रहेका महबुबले मलेसियालाई पराजित गर्न ३.४ ओभरमा २० रन खर्चेर ३ विकेट लिएका थिए । त्यस्तै कतारलाई पराजित गर्न पनि उत्कृष्ट प्रर्दशन गदै ४ ओभरमा ३८ रन खर्चेर ३ विकेट लिएका थिए । महबुबले आफ्नो अनुभवसँगै उत्कृष्ट लयलाई निरन्तरता दिए नेपाली ब्याट्सम्यानको लागि टाउको दुखाईको बलर बन्न सक्छन् ।

मनप्रित सिंह (अलराउण्डर)

मनप्रित सिंह अद्भुत क्षमता भएका खेलाडी हुन् । २४ वर्षिय सिंह ब्याटिङ बलिङ र विकेटकीपर तीनै गर्न सक्छन् । सिंह टी २० आईमा सिंगापुरबाट सर्वाधिक रन बनाउने खेलाडीमा दोस्रो स्थानमा छन् । मलेसियासँग २६ रनमा अविजित रहँदा कतारसँग ३४ रन जोडेका थिए । स्पिनर सिंहले गत वर्ष एसिया क्वालिफायर बीमा भुटान र थाईल्यान्डसँगको खेलमा समान ४ विकेट लिएका थिए । डिभिजन ३ को खेलमा युडान्डाविरुद्ध ५९ रन जोडेका थिए । सिंहले आफ्नो अलराउण्डर प्रर्दशनमा नेपाललाई कडा टक्कर दिन सक्छन् ।

सुरेन्द्रन चन्द्रमोहन (प्रमुख ब्याट्सम्यान)

पहिलो पटक ग्लोबल छनोटमा पुग्ने लक्ष्य राखेको घरेलु टोली सिंगापुरको लागि ओपनर चन्द्रमोहनको प्रर्दशन महत्वपूर्ण रहने छ । मलेसियालाई स्तब्ध पार्न मोहनले ५० रनमा अविजित रहँदै म्यान अफ द म्याच घोषित चुनिएका थिए । त्यस्तै कतारसँगको खेलमा ४७ रनको उत्कृष्ट इनिङ खेलेका थिए । मोहनले गत वर्ष एसिया क्वालिफायर बी को खेलमा नेपालविरुद्ध २५ रन जोडेका थिए ।

त्यसै प्रतियोगितामा भुटानसँगको खेलमा ८० रनको उत्कृष्ट इनिंग खेलेका थिए । सिंगापुरबाट टी २० आईमा सर्वाधिक रन बनाउने खेलाडी समेत रहेका चन्द्रमोहन नेपाली बलरको लागि टाउको दुखाईको ब्याट्सम्यान बन्न सक्छ । मोहन दबाबमा पनि रन जोडेन माहिर छन । मोहनलाई जति छिटो पेभिलिएन फर्काउन सकिन्छ त्यतिनै फाईदा हुने देखिन्छ ।