काठमाडौं (हाम्रो खेलकुद) – श्रीलंकामा सेप्टेम्बर ५ देखि १४ सम्म हुने एसीसी यू१९ एसिया कपको लागि पाकिस्तान क्रिकेट बोर्डले १५ सदस्य टोली घोषणा गरेको छ ।

पाकिस्तानले १२ अभ्यास खेलपछि अन्तिम टोली टुंगो लगाएको हो । पाकिस्तानले दक्षिण अफ्रिकालाई ७-० र श्रीलंकालाई ३-२ मा पराजित गरेको थियो । दक्षिण अफ्रिका र श्रीलंकासँग गरेको प्रर्दशनको आधारमा पाकिस्तानले टोली छनोट गरेको जनाएको छ ।

पुरानै कप्तानलाई निरन्तरता

पाकिस्तानले कप्तानको जिम्मा विकेटकीपर रोहेल नाजिरलाई दिएको छ । नाजिरकै कप्तानीमा पाकिस्तानले गत वर्ष एसिया कपमा खराब प्रर्दशन गरेको थियो । एसिया कपमा खराब प्रर्दशनको कारण उनलाई गत वर्ष न्युजिल्यान्डमा भएको यू१९ विश्वकपमा कप्तानबाट हटाईएको थियो । नाजिरले उक्त विश्वकपमा ५ खेलमा १ सय ४० रन बनाएका थिए । नाजिरले पाकिस्तानबाट ४ प्रथम श्रेणी र ६ लिष्ट ए खेलेका छन् ।

खराब प्रर्दशन

गत वर्ष वंगलादेशमा भएको यू१९ एसिया कपमा पाकिस्तानले खराब प्रर्दशन गरेको थियो । गत वर्ष एसिया कपमा समुह ‘बी’ मा रहेको पाकिस्तानले ३ खेलमा १ मा जित र २ मा हारका साथ तेस्रो स्थानमा रहँदै समुह चरणबाटै बाहिरिनु पर्यो । पाकिस्तान बंगलादेशसँग ३ विकेट र श्रीलंकासँग २३ रनले पराजित भएको थियो । हङकङलाई भने ९ विकेटले पराजित गरेको थियो । यस पटक पाकिस्तानले उत्कृष्ट प्रर्दशन गर्ने लक्ष्य राखेको छ ।

नेपालको तयारीनै ढिला

यता नेपालले पनि यस एसिया कपमा सहभागिता जनाउने छ । गत महिना यू-१९ इस्टर्न रिजन प्रतियोगिताको विजेता बन्दै एसिया कपमा छनोट भएको नेपालले विहीबार देखी अनौपचारीक प्रशिक्षण सुरु गरेको छ । औपचारिक प्रशिक्षण भने आगमी २७ गतेदेखी सुरु गर्ने छ । एसियन क्रिकेट काउन्सिल (एसीसी) ले २७ गते देखि मात्र प्रशिक्षण गर्ने स्वीकृति दिँदा धेरै ढिला भएको हो ।

ढिला हुने भएपछि खेलाडी र प्रशिक्षकले आफ्नै पहलमा अभ्यास थालेका छन् । प्रशिक्षणमा ३६ खेलाडीको माग गरेपनि एसीसीले १९ खेलाडीलाई मात्रै स्वीकृती दिएको प्रशिक्षक विनोद दास बताउछन् । नेपालले भदौं ७ सम्म मात्रै नेपालमा प्रशिक्षण थाल्ने छ ।

विदेशमा अभ्यासको बारे अझै टुंगो लागेको छैन । श्रीलंकामा हुन सक्ने संभावना रहेपनि आधिकारीक रुपमा निर्णय आएको छैन । साविक विजेता भारतले पनि आफ्नो टोली घोषणा गरि सकेको छ । अन्य टोली अन्तिम टोली घोषणा गर्ने तयारीमा छन् । नेपालले भने औपचारिक प्रशिक्षणनै सुरु गरेको छैन ।

सेप्टेम्बर ५ देखि १४ सम्म श्रीलंकामा हुने यू१९ एसिया प्रतियोगितामा भारत, पाकिस्तान, श्रीलंका, बंगलादेश, अफगानिस्तान, यूएई, नेपाल र कुवेत छन् ।

पाकिस्तानको १५ सदस्य टोली :
रोहोल नाजिर (कप्तान तथा विकेटकीपर), हैदर अली,(उपकप्तान), अबु हुरैरा, अब्दुल वाहिद बन्गलाजाई, अख्तर शाह, फहद मुनिर, अब्बास अफ्रिदी, बासित अली, मोहम्मद हरिस, इराफन खान, मोहम्मद वासिम, निशम शाह, क्यासिम अकराम