काठमाडौं (हाम्रो खेलकुद) – मेरिलेबोन क्रिकेट क्लब (एमसीसी) सँग नेपाल पराकिलो हार नजिक पुगेको छ । तेस्रो तथा अन्तिम दिन टि ब्रेक अघि ३ सय ९३ रनको विजयी लक्ष्य पछ्याएको नेपाल ३५ ओभरमा ८ विकेट गुमाउँदै १ सय ४४ रन बनाएको छ ।

नेपालले जितको लागि अन्तिम सेसनमा २ सय ४९ रन बनाउनु पर्ने हुन्छ । नेपालका लागि सन्दीप लामिछाने २ छक्का र १ चौका सहित १६ रनमा क्रिजमा छन् । सन्दीपले एलेक्स थम्सपनलाई ३४ ओभरको तेस्रो र चौथो बलमा लगातार दुई छक्का तथा पाँचौ बलमा चौका प्रहार गरेका थिए । सन्दीपले पहिलो इनिङमा २१ बलमा ४ छक्का र २ चौका सहित ३९ रनमा अविजित रहेका थिए । सोमपाल कामी २२ रनमा अविजित छन् ।

ओपनर तथा विकेटकीपर राजु रिजाल ५ चौका सहित ३१ रन जोडे । शरद भेषवकर १५, ज्ञानेन्द्र मल्ल ६, मध्यक्रमका विनोद भण्डारी, दीपेन्द्र सिंह ऐरी र पवन सरार्फ शून्यमा पेभिलिएन फर्के । तल्लोक्रममा सोमपाल कामी र करण केसीले ४६ रनको सझेदारी गरे । ३२ ओभरमा करण केसी १८ रनमा एलबी डब्लू आउट भएका छन् ।

त्यसअघि नेपाललाई ३ सय ९३ रनको विशाल लक्ष्य दिने क्रममा तेस्रो दिनको पहिलो सेसनमा एमसीसीले ३६ ओभरमा १८१-६ को दोस्रो इनिङ समाप्तीको घोषणा गरेको थियो । पहिलो इनिङमा २ सय ११ रनको अग्रता लिएको एमसीसीले सम्रगमा ३ सय ९२ रनको अग्रता लिएको हो । तेस्रो दिन एमसीसीले २१ ओभरमा ९१–२ को अवस्थाबाट सुरु गरेको थियो । विहीबार पहिलो इनिङमा नेपाल ४४.४ ओभरमा १ सय ५३ रनमा अल आउट भएको थियो ।