काठमाडौं (हाम्रो खेलकुद) – तेस्रो संस्करणको जीत बहादुर स्मृती पाँचपोखरी सुपर-८ क्रिकेट प्रतियोगिताको उपाधि श्रृखंला छिम्ती क्रिकेट क्लबले जितेको छ ।
शनिबार फाइनलमा आयोजक पाँचपोखरी क्रिकेट क्लबलाई ३ विकेटले पराजित गर्दै उपाधि जितेको हो । योसँगै विजेता श्रृखंलालले ७५ हजार र उप विजेता पाँचपोखरीले ३५ हजार प्राप्त गर्यो ।
टस हारेर ब्याटिङ थालेको पाँचपोखरीले ७.५ ओभरमा अल आउट हुँदै ७५ रनमा समेटियो । उसका मधु धितालले २४ र सबिन धितालले २३ रन जोड्न बाहेक अन्यले राम्रो प्रर्दशन गर्न सकेनन् । श्रृखलाका सुजर तामाङले ३ र अरब तामाङले २ विकेट लिए । ७६ रनको विजयी लक्ष्य पछ्याएको श्रृखंलालले ७.३ ओभरमा ४ विकेट गुमाउँदै पुरा गर्यो । उसका जंग बहादुर तामाङले ५० र अशोक तामाङले १४ रन जोड्दै उपाधि पक्का गरे ।
त्यसअघि पहिलो सेमिफाइनलमा भोटाङ युथ क्लबलाई ५ विकेटले पराजित गर्दै श्रृखंला फाइनलमा पुगेको थियो । टस जितेर ब्याटिङ थालेको भोटाङ ८ ओभरमा ४ विकेट गुमाउँदै ७६ रन बनाएको थियो । उसका जयराम तामाङले १९ र सुरज तामाङले ३१ रन जोडे । ७७ रनको लक्ष्य श्रृखंलालले ५.४ ओभरमा २ विकेट गुमाउँदै पुरा गर्यो ।
दोस्रो समिफाइनल खेलमा पाँचपोखरीले मेलम्ची नगरपालीकालाई ३२ रनले हराउँदै फाइनलमा पुगेको थियो । टस हारेर ब्याटिङ थालेको पाँचपोखरीले ८ ओभरमा १ विकेट गुमाउँदै १ सय ५ रन बनाएको थियो । पाँचपोखरीका सार्थक धितालले २० बलमा ५० रन जोड्दै म्यान अफ द म्याच चुनिए । अनुभवी ब्याट्सम्यान विजय धितालले २४ बलमा ३६ रन जोडे । सार्थक विजयका छोरा हुन् । बाबु छोराले पाँचपोखरीलाई बलियो योगफलसम्म पुर्याएका थिए ।
१ सय ६ रनको विजयी लक्ष्य पछ्याएको मेलम्ची अल आउट हुँदै ७३ रनमा समेटियो । बाल कृष्ण दुलालले ३३ रन जोडे । पाँच पोखरीका सार्थक धितालले २ ओभरमा २१ रन खर्चेर २ विकेट लिए । मधु धितालले २ ओभरमा २३ रन खर्चेर ३ विकेट लिए । विजय धितालको नाममा २ विकेट रह्यो ।
प्रतियोगिताको उत्कृष्ट बलर ६ विकेट लिएका एकनाथ नेपाल चुनिए । प्रतियोगिताभर १ सय ४९ रन जोडेका अरुण तामाङ उत्कृष्ट ब्याट्सम्यान घोषित भए । जंग बहादुर तामाङ म्यान अफ द सिरिज चुनिए । उनले प्रतियोगिताभर २ सय २ रन बनाउनुको साथै २ विकेट लिएका थिए ।
निसान धिताल उदयमान खेलाडी घोषित भए । पाँचपोखरी थाङ्गपाल गाउँपालिका वडा नम्बर ६ धापमा जन्मिएका पारा ओलम्पिक खेलाडी स्व जित बहादुर खड्काको स्मृतिमा यस प्रतियोगिता गरिएको हो । जीत बहादुरको २०७२ सालमा गएको महा-भुकम्पको परि मृत्यु भएको थियो ।
