पोखरा (हाम्रो खेलकुद) – १३ औं दक्षिण एसियाली खेलकुद (साग) महिला टि ट्वान्टी क्रिकेटको स्वर्ण बंगलादेशले जितेको छ । आइतबार फाइनलमा बंगलादेशले श्रीलंकालाई २ रनले हराउँदै श्रीलंकाले स्वर्ण जितेको हो ।

अन्तिम ओभरमा ७ रन चाहिएको अवस्थामा श्रीलंकाले ४ रन बनाउन दुई विकेट गुमाएपछि रजत पदकमा चित्त बुझाउनु पर्ने भएको हो । बंगलादेशले प्रस्तुत गरेको ९२ रनको सामान्य लक्ष्य पछ्याएको श्रीलंकाले २० ओभरमा ९ विकेट गुमाउँदै मात्र ८९ रन बनायो ।

श्रीलंकाकी कप्तान हर्षिता माधवीले ३३ बलमा ४ चौका सहित ३२ रनको योगदान दिइन् । त्यस्तै लिहिनी अप्सराले २८ बलमा २ चौका सहित २५ रनको योगदान दिइन् । उमिषा थिमाशिनी ७, जानदी अनली १, काभिष्का दिलहरी ४ रनमा आउट भए ।

बंगलादेशकी नहिदा अख्तर २, जहानरा आलम, सल्मा खातुन र खादिजा तुल कुर्बाले १–१ विकेट लिए । त्यस अघि पोखरा रंगाशालमा टस हारेर ब्याटिङ थालेको बंगलादेशले निर्धारित २० ओभरमा ८ विकेट गुमाउँदै ९१ रन बनाएको थियो ।

बंगलादेशकी ओपनर मुर्सिदा खातुनले १५ बलमा ३ चौका सहित १४ रनमा आउट हुँदा अर्की ओपनर आयशा हमान २ रनमा आउट भइन् । सञ्जीदा इस्लाम १५, निगर सुल्तना २९ र फहिम खातुनले १५ रनको योगदान दिइन् ।

श्रीलंकाकी उमिषा थिमाशिनीले ४ ओभरमा २ मेडन सहित ८ रन खर्चेर ४ विकेट लिइन् । सत्या सन्दीपनी, थारिका सेवान्डी, काभिष्का दिलहारी र मल्शा रन्तुगांले १–१ विकेट लिए । बंगलादेश र श्रीलंका दुबैसँग पराजित भएको नेपालले माल्दिभ्सलाई १० विकेटले हराउँदै कास्य जितेको थियो ।