भूपेन्द्र जिसी, पोखरा

राष्ट्रिय टोलीका कप्तान ज्ञानेन्द्र मल्ल नेपाली क्रिकेटमा पछिल्लो दुई वर्ष सर्वाधिक आलोचनाको शिकार बन्न पुगे । खराब प्रर्दशन र लगातार पाई रहेको अवसर सदुपयोग गर्न नसक्नु आलोचनाको प्रमुख कारण थियो ।

ज्ञानेन्द्रले निरन्तर खराब प्रर्दशन गरि रहँदा टोेलीले सधैं उत्कृष्ट प्रर्दशनको आशामा मौका दिई रह्यो । टोलीले ज्ञानेन्द्रबाट आशा कहिल्यै मारेन । एक आध खेल बाहेक अन्यमा प्रर्दशन राम्रो गर्न सकेनन् । खराब प्रर्दशन गरि रहँदा टोलीमा निरन्तर मौका दिएको भन्दै तत्कालिन कप्तान पारस खड्का, प्रशिक्षक जगत टमटा र उमेश पटवलमाथिनै समर्थकले प्रश्न उठाएका थिए ।

आलोचना यति सम्म बढेको थियो कि ज्ञानेन्द्रलाई टोलीबाटै निकाल्नुपर्छ भन्ने सम्मका आवज सामाजिक सञ्जालमा उठेका थिए । आलोचना झनपछि झन बढ्दै थियो । ज्ञानेन्द्रले गत जुलाईमा आईसीसी टि ट्वान्टी विश्वकप एसिया छनोटमा मलेसियाविरुद्ध २० बलमै ५० रन जोड्दै नेपालबाट टि ट्वान्टी आईमा सर्वाधिक छिटो अर्ध शतक पुरा गर्ने कीर्तिमान कायम गरे । जुन खेलमा ज्ञानेन्द्रले २१ बलमा ५ चौका र ३ छक्का सहित ५१ रन जोडेपछि नेपालले सहज जित पक्का गरेको थियो ।

ज्ञानेन्द्रले ४ खेलमा १ सय ३२ रन जोड्दै प्रतियोगिताकै सर्वाधिक रन जोड्ने खेलाडीमा दोस्रो स्थानमा रहे । यस्ले आलोचनालाई केहि हद सम्म कम गर्यो । सिंगापुर, नेपाल र जिम्बावे त्रिकोणात्मक तथा ओमानमा भएको पाँच राष्ट्रको टि ट्वान्टी सिरिजमा ज्ञानेन्द्रले ब्यक्तिगत कारण आफ्नो नाम फिर्ता लिए । यी दुई सिरिजपछि पारसले कप्तानी छाडे । ज्ञानेन्द्र कात्तिक १३ मा कप्तान बने ।

अघिल्लो महिना बंगलादेशमा भएको एसीसी इमर्जिङ एसिया कपमा हङकङ र भारतसँग शून्यमा आउट भएपछि ज्ञानेन्द्रको आलोचना पुन बढेको थियो । दुई साता अघि सम्पन्न १३ औं दक्षिण एसियाली खेलकुद (साग) मा ज्ञानेन्द्रले ४ खेलमा १ शतक सहित २ सय १२ रन जोड्दै उत्कृष्ट ब्याट्सम्यान चुनिए । साग लगत्तै पोखरा प्रिमियर लिगमा काठमाडौं गोल्डेन्स वारियर्सको कप्तानी समालेका ज्ञानेन्द्रले राम्रो प्रर्दशन गरेका छन् ।

सागमा ज्ञानेन्द्रले भुटानविरुद्ध १ सय ७ रनको अविजित शतकीय इनिङ खेलेका थिए । त्यो शतकको तीन सातापछि पीपीलमा धनगढीविरुद्ध ३७ बलमै शतक पुरा गरे । ३८ बलमा ८ चौका र ९ छक्का प्रहारगर्दै एक सय रन जाडेका थिए । मल्लले प्रहार गरेका सबै चौका र छक्का उत्कृष्ट र आत्माविश्वासी सट थिए । विराटनगर टाईटन्सविरुद्ध ३३ बलमा ३ चौका र २ छक्का सहित ४५ रन जोड्दै टोलीको जित सहज बनाए ।

काठमाडौंको कप्तानी समाली रहेका ज्ञानेन्द्र सुरुवाती ४ खेलमा १ सय ६१ रन बनाउँदै सर्वाधिक रन बनाउने खेलाडीमा शीर्ष स्थानमा छन् । स्ट्राइक रेट १ सय ७६ माथि छ । यसले ज्ञानेन्द्र लयमा फर्किएको संकेत देखाउछ । ज्ञानेन्द्रले आफुलाई आलोचना गर्ने बाटो बन्द गराएका छन् ।

ज्ञानेन्द्रले पछिल्लो एक वर्षमा नेपाली क्रिकेटमा तीन शतक प्रहार गरेका छन् । टि ट्वान्टी आईमा सागमा भुटानसँग, पीपीएलमा बुटवल ब्लास्टर्ससँग र गत जेठमा एक दिवसिय प्रधानमन्त्री कपमा प्रदेश ३ बाट सशस्त्र प्रहरी बल एपीएफ विरुद्ध १ सय १७ रनको शतक इनिङ खेलेका थिए ।
अहिले राम्रो भई रहेको र यस लयलाई निरन्तरता दिन सक्नुपर्ने ज्ञानेन्द्र बताउछन् । गत वर्षको फ्रेन्चाइज लिगमा ज्ञानेन्द्रको प्रर्दशन खराब थियो ।

ज्ञानेन्द्रले तीन साताको अन्तरमा जुन प्रर्दशन गरेका छन् यसले लयमा फर्किएको संकेत देखाउछ । साग र पीपीएलमा उत्कृष्ट प्रर्दशन गरेका ज्ञानेन्द्रले आगमी दिनमा अन्तर्राष्ट्रिय खेलमा त्यस्तै प्रर्दशनलाई निरन्तरता दिनुपर्ने चुनौती छ । यहि लयलाई ज्ञानेन्द्रले आगमी दिनमा कायम राख्न सक्नुपर्छ । अन्यथा कप्तानलेनै कमजोर प्रर्दशन गर्दा प्रश्न माथि प्रश्न उठ्ने निश्चित छ ।