पोखरा (हाम्रो खेलकुद) – पारस खड्काको कप्तानीमा रहेको चितवन राइनोज पोखरा प्रिमियर लिग (पीपीएल) को फाइनलनजिक पुगेको छ । विराटनगर टाइटन्सलाई १८ रनले हराउँदै चितवनले प्लेअफमा स्थान पक्का गरेको छ ।

पोखरा रंगशालामा आइतबार जितका लागि १ सय ४७ रनको विजयी लक्ष्य पछ्याएको विराटनगर १९ औं ओभरमा अल आउट हुँदै १ सय २८ रनमा समेटियो । विराटनगरले चितवनविरुद्ध पनि सुरुवात देखि नै खराब प्रर्दशन गर्यो । विराटनगरका लागि युवा ब्याट्सम्यान लोकेश बमले ३६ बलमा ५ चौका र ५ छक्का प्रहार गर्दै ६२ रन जोडेपनि अन्य खेलाडीको साथ नपाउँदा विराटनगरको टोलीको हार टार्न सकेनन् । लोकेशलाई करण केसीले १९ औं ओभरको तेस्रो बलमा विकेटकीपर अनिल कुमार शाह बाट क्याच आउट गराएका थिए ।

दोस्रो ओभरको पहिलो बलमै सन्नी पटेलले ओपनर मोहम्मद जैद आलमलाई १ रनमा एलबी डब्लू आउट गरे । तेस्रो ओभरको पहिलो बलमा करण केसीले अर्का ओपनर सुनिल धमलालाई विकेटकीपर अनिल कुमार शाहबाट ५ रनमा क्याच आउट गराए । छैटौं ओभरको अन्तिम बलमा भुवन कार्कीले कप्तान प्रदीप ऐरीलाई ९ रनमा बोल्ड आउट गरे । भुवन कार्कीले नै राजु रिजाललाई १ रनमा एलबी डब्लू आउट गरे ।

आठौं ओभरको चौथो बलमा भुवनले पाकिस्तानी युवा ब्याट्सम्यान नोमन खानलाई १८ रनमा एलबी डब्लू आउट गरेपछि विराटनगर संकटमा परेको थियो । नोमनले १६ बलमा २ चौका र १ छक्का प्रहार गरे । नवौं ओभरको दोस्रो बलमा पुनित मेहरासँग रनमा तालमेल गर्न नसक्दा राजेश पुलामी मगर शून्यमा रन आउट हुन पुगेपछि विराटनगर ३७–६ को कमजोर अवस्थामा पुगेको थियो । सातौ विकेटका लागि युवा ब्याट्सम्यान लोकेश बम र पुनित मेहराले ७७ रनको साझेदारी गर्दै जितको संभावना कायमै राखेका थिए ।

१८ औं ओभरको तेस्रो बलमा रोहन मुस्तफाले पुनितलाई २४ रनमा बोल्ड आउट गरेपनि जित कठिन बनेको थियो । उनले २६ बलमा २ चौका प्रहार गरे । १६ औं ओभरको अन्तिम बलमा सन्नी पटेलले लोकेश बमलाई ४० रनमा रन आउट गर्न चुकेका थिए । लोकेशले ३३ बलमा अर्ध शतक प्रहार गरेका थिए । रोहन मुस्तफाले ४ ओभरमा २१ रन खर्चेर २ विकेट लिए । भुवन कार्कीले ३ ओभरमा १४ रन खर्चेर ३ विकेट लिए । करण केसीले ४ ओभरमा ३३ रन खर्चेर ३ विकेट लिए । सन्नी पटेलको नाममा १ विकेट रह्यो ।

त्यसअघि पोखरा रंशालामा टस हारेर ब्याटिङ थालेको चितवन राइनोजले २० ओभरमा ४ विकेट गुमाउँदै १ सय ४६ रन बनाएको थियो । तल्लोक्रममा आरिफ शेखले आक्रामक ब्याटिङ गर्दै २२ बलमा ३ चौका र ३ छक्का सहित ३९ रनमा अविजित रहे । सन्नी पटेल ८ बलमा १ चौका र ३ छक्का सहित २७ रनमा अविजित रहे । पाँचौ विकेटका लागि मात्रै १६ बलमा आरिफ र सन्नीले ५४ रनको साझेदारी गरेपछि चितवन बलियो योगफलमा पुगेको हो । १९ औं ओभरमा जितेन्द्र मुखियालाई ३ छक्का र १ चौका सहित सन्नी पटेलले कुल २७ रन बटुलेका थिए ।

सामान्य योगफलतर्फ अग्रसर चितवनलाई यी दुईको ब्याटिङले बलियो योगफलमा पुर्याएको थियो । तेस्रो ओभरको पाँचौ बलमा जितेन्द्र मुखियाले ओपनर रोहन मुस्तफालाई विकेटकीपर राजु रिजालबाट ७ रनमा क्याच आउट गराए । मोहम्मद जैद आलमको ११ औं ओेभरको पाँचौ बलमा ठूलो सट खेल्ने धुनमा कप्तान पारस खड्का नोमन खानबाट ३५ रनमा समातिए । पारसले ३८ बलमा ५ चौका प्रहार गरे । दोस्रो विकेटका लागि पारस र बाबर हायतले ४७ रनको साझेदारी गरेका थिए ।

१४ औं ओभरको अन्तिम बलमा पुनित मेहराले अनिल कुमार शाहलाई ३ रनमा बोल्ड आउट गरे । मध्यक्रममा दुई स्पिनर पुनित मेहरा र साहब आलमले कसिलो बलिङ गरेपछि चितवनलाई दबाबमा राखेपनि विराटनगर अन्त्यतिर चुकेको थियो । १८ औं ओभरको दोस्रो बलमा युवा तीब्र गतिका बलर किशोर महतोले बाबरलाई २५ रनमा राजुबाट क्याच गराएपछि थप दबाबमा परेको थियो । बाबरले ३१ बलमा २ चौका प्रहार गरे ।

स्पिनर साहब आलमले ४ ओभरमा १ मेडन सहित १३ रन खर्चिए । पुनित मेहराले ४ ओभरमा १३ रन खर्चेर १ विकेट लिए । जितेन्द्र मुखियाले ४ ओभरमा ५४ रन खर्चेर १ विकेट लिए ।

पहिलो खेलमा साविक विजेता पोखरा पल्टनलाई ६ विकेटले हराएको चितवनले दोस्रो खेलमा बुटवललाई १ सय १९ रनको फराकिलो अन्तरले पराजित गरेको थियो । तेस्रो खेलमा चितवनले धनगढीलाई ५२ रनले पराजित गरेको थियो ।

चितवनले अन्तिम खेल मंगलबार काठमाडौं गोल्डेन्ससँग खेल्नेछ । यता विराटनगर पहिलो खेलमा धनगढीसँग ५ रनले पराजित भएको थियो । विराटनगरले दोस्रो खेलमा पोखरालाई ४५ रनले पराजित गरेको थियो । तेस्रो खेलमा भने विराटनगर काठमाडौंसँग ३६ रनले पराजित भएको थियो । विराटनगरले अन्तिम खेल बुधबार बुटवल ब्लास्टर्ससँग खेल्नेछ ।