पोखरा (हाम्रो खेलकुद) – दोस्रो संस्करणको पोखरा प्रिमियर लिग (पीपीएल) मा पोखरा पल्टन र एक्स्पर्ट धनगढी ब्लुजबीच प्रतिस्पर्धा हुँदैछ । खेल विहान ११ः३० देखी पोखरा रंगशालामा सुरु हुनेछ ।

दुबै टोलीको यो लिग चरणको अन्तिम खेल हो । दुबै टोलीको प्ले अफको अंक गणितीय झिनो संभावना मात्रै बाँकी छ । दुबैले समान ४ खेलमा ३ खेलमा हार र १ मा जित सहित समान २ अंकका साथ पोखरा नेट रन रेटले पाँचौ र धनगढी पुछारमा छन् ।

दुबै टोलीलाई प्ले अफमा पुग्न अप्रत्याशित फराकिलो जितको आवश्यकता पर्छ । साथै उता मंगलबार काठमाडौं गोल्डेन्स वारियर्स चितवन राइनोजसँग पराकिलो अन्तरले पराजित हुनुपर्छ । सामान्य अन्तरले पराजित भए पनि काठमाडौंको नेट रन रेट राम्रो हुँदा प्ले अफमा पुग्ने समिकरण बलियो छ ।

बुटवल ब्लास्टर्सले बुधबार विराटनगरलाई पराजित गरे अझ सहज हुनेछ । पोखराले पहिलो खेलमा काठमाडौंलाई ९ विकेटले हराउँदै उत्कृष्ट सुरुवात गरेको थियो । तर लगतार हार बेहोर्न पुगेपछि साविक विजेता पोखरा प्ले अफबाटै बाहिरिने संघारमा छ । पोखरा दोस्रो खेलमा चितवनसँग ६ विकेटले पराजित हुन पुग्यो । तेस्रो खेलमा विराटनगरसँग ४५ रनले पराजित भएपछि अघिल्लो चरण निकै कठिन बनेको थियो । चौथो खेलमा बुटवल ब्लास्टर्ससँग ८ विकेटले पराजित भएपछि पोखराको अंक गणितीय संभावना मात्रै बाँकी रह्यो ।

ब्याटिङ नचल्नु पोखराको प्रमुख चिन्ताको विषय रह्यो । ओपनर आशिफ शेख, भारतीय ब्याट्सम्यान गौरव तोमर, कप्तान शरद भेषावाकर, रोहित कुमार पौडेल र विनोद भण्डारीले ठूलो इनिङ खेल्न सकिरहेका छैनन् । बुटवलविरुद्ध इशान पाण्डेलाई मैदान उतारेको पोखराले उनको स्थानमा आज आशिफ शेखलाई मौका दिने संभावना छ । चारै खेलमा बेन्चमा बसेका युवा तीब्र गतिका बलर आकाश चन्दको आजको खेलमा संभावना छ ।

यता धनगढीको लागि प्ले अफ पुग्ने समिकरण असम्भव जस्तै छ । पुछारमा रहेको धनगढीको रन रेट – २.३६४ छ । यो अवस्थामा धनगढीले अकल्पनीय फराकिलो जित निकाल्नु पर्ने हुन्छ । अन्य नतिजा पनि आफु अनुकुल आउनुपर्छ । बलियो पोखरामाथि अकल्पनिय जित कठिन छ। पहिलो खेलमा विराटनगरमाथि ५ रनको रोमान्चक जित निकाल्दै विजयी सुरुवात गरेको धनगढीले लगतार तीन खेलमा पराजित हुन पुग्यो ।

दोस्रो खेलमा काठमाडौंसँग १ सय ६ रनले पराजित हुँदा तेस्रो खेलमा चितवनसँग ५२ रनले हारेको थियो । बुटवलसँग ७ विकेटले पराजित भएपछि धनगढीको अघिल्लो चरण अंक गणितीय संभावना मात्रै बाँकी रहेको हो । धनगढीका लागि कप्तान दीपेन्द्र सिंह ऐरीले उत्कृष्ट प्रर्दशन गरि रहेका छन् ।

बुटवलविरुद्ध ६१ रनको इनिङ खेलेका दीपेन्द्रले पोखराविरुद्ध ४९ बनाउनुको साथै दुई विकेट लिएका थिए । दीपेन्द्रको एक्लो प्रयास टोलीको जितको लागि प्राप्त भएन । दीपेन्द्रले आजको खेलमा पनि आफ्नो तर्फबाट हर प्रयास गर्ने छन् ।