पोखरा (हाम्रो खेलकुद) – लगातार चौथो हारसँगै शरद भेषावकर कप्तान रहेको साविक विजेता पोखरा पल्टन दोस्रो संस्करणको पोखरा प्रिमियर लिग (पीपीएल) को लिग चरणबाटै बाहिरिएको छ । सोमबार एक्स्पर्ट धनगढी ब्लुजसँग ५ विकेटले पराजित हुँदै लिग चरण बाहिरिने पोखरा पहिलो टोली बनेको हो ।

जितका लागि ८० रनको सामान्य लक्ष्य पछ्याएको धनगढीले ९.१ ओभरमा ५ विकेट गुमाउँदै पुरा गर्यो । धनगढीको जितमा दीपक पुनिया १६ बलमा २ चौका र १ छक्का सहित २५ रनमा क्याच आउट भए । दीपक आठौं ओभरको पहिलो बलमा ठूलो सट खेल्ने धुनमा क्याच आउट हुन पुगे ।

तेस्रो ओभरको तेस्रो बलमा रोड्रिगो थोमसलाई प्रथामेश दाकेले रोहित कुमार पौडेलबाट १५ रनमा क्याच आउट गराए । उनले १० बलमा २ चौका र १ छक्का प्रहार गरे । पाँचौ ओभरको दोस्रो बलमा दाकेलेनै कुशल भुर्तेलबाट दीपेन्द्र सिंह ऐरीलाई १३ रनमा क्याच आउट गराए । दीपेन्द्रले १० बलमा ३ चौका प्रहार गरे । सुवेन्दु पाण्डे ११ रनमा क्याच आउट भए ।

नवौं ओभरको तेस्रो बलमा ठूलो सट खेलेका सन्दीप जोरालाई बाउन्ड्री लाइन नजिकै आशिफ शेखले उत्कृष्ट डाइभ हान्दै २ रनमा क्याच लिए । मञ्जित श्रेष्ठ ९ र अमित यादव ६ रनमा अविजित रहे । प्रथामेश दाके र सर्वजीत लड्डाले २–२ विकेट लिए । ललित नारायण राजवंशीको नाममा १ विकेट रह्यो ।

त्यसअघि पोखरा रंगशालामा टस जितेर ब्याटिङ थालेको पोखरा १६.३ ओभरमा ७९ रनमा अल आउट भएको थियो। धनगढीको कसिलो बलिङ र चुस्त फिल्डीङसामु साविक विजेता पोखराका ९ खेलाडीले दोहोरो अंकमा रन जोड्न सकेनन् । दोस्रो ओभरको दोस्रो बलमा कमलसिंह ऐरीले सागर ढकालबाट ओनपर कुशल भुर्तेललाई ६ रनमा क्याच आउट गराए ।

भारतीय तीब्र गतिका बलर दीपक पुनियाको तेस्रो ओभरको तेस्रो बलमा कप्तान शरद भेषावकर हिट विकेटको रुपमा ४ रनमा आउट भए । उनले डिप स्क्वायर लेगतर्फ सट प्रहार गर्नेक्रममा ब्याट स्विङ हुँदै स्टम्पमा लागेको थियो । लगत्तै एक बल पछि पुनियाले पोखराका प्रमुख ब्याट्सम्यान रवि इन्दर सिंहलाई शून्यमा विकेटकीपर सुवेन्दु पाण्डेबाट क्याच आउट गराए ।

आठौं ओभरको पाँचौ बलमा स्पिनर अनिल खरेलले विकेटकीपर विनोद भण्डारीलाई १२ रनमा बोल्ड आउट गरे । दशौं ओभरको दोस्रो बलमा कुशल मल्ल २ रनमा रन आउट हुन पुगे । ११ औं ओभरको दोस्रो बलमा सागर ढकालले कृष्ण कार्कीलाई दीपकबाट १ रनमा क्याच आउट गराउँदा पोखरा ६८–६ को कमजोर अवस्थामा पुगेको थियो ।

यसै ओभरको अन्तिम बलमा ठूलो सट खेल्ने क्रममा रोहित कुमार पौडेल उत्कृष्ट क्याचको शिकार बने । रोहितले लङ अनमा गरेको प्रहार अमित यादवले बाउन्ड्रीमा उत्कृष्ट जम्प हान्दै बचाए र आफू बाउन्ड्रीबाहिर पुग्न लाग्दा मैदानभित्र रहेका फिर्दोस अन्सारीलाई बल दिँदै शून्यमा क्याच गराएपछि पोखराबाट ठूलो योगफलको संभावना टाढिएको थियो ।

१२ औं ओभरको पाँचौ बलमा अनिल खरेलले आशिफ शेखलाई ३२ रनमा एलबीडब्लू आउट गरे । आशिफले २९ बलमा ४ चौका प्रहार गरे । युवा स्पिनर अनिल खरेलले ४ ओभरमा मात्रै १५ रन खर्चेर ३ विकेट लिए । सागर ढकालले ४ ओभरमा १५ रन खर्चेर २ विकेट लिए । दीपक पुनियाले ४ ओभरमा १३ रन खर्चेर २ विकेट लिए । कमल सिंह ऐरीको नाममा २ विकेट रह्यो ।

पोखराले पहिलो खेलमा काठमाडौंलाई ९ विकेटले हराउँदै उत्कृष्ट सुरुवात गरेको थियो । तर लगतार चारै खेलमा पराजित हुँदै लिग चरणबाटै बाहिरिएको हो । दोस्रो खेलमा चितवनसँग ६ विकेट भएको थियो । तेस्रो खेलमा विराटनगरसँग ४५ रन र बुटवल ब्लास्टर्ससँग ८ विकेटले पराजित भएको थियो । गत वर्ष पोखराले चितवन राइनोजलाई हराउँदै उपाधि जितेको थियो ।

पहिलो खेलमा धनगढीले विराटनगरलाई ५ रनले हराएको थियो । दोस्रो खेलमा काठमाडौंसँग १ सय ६ रन र ५२ रनले पराजित भएको थियो। बुटवलसँग ७ विकेटले पराजित भएको छ । धनगढीको प्ले अफको संभावना झिनो छ । धनगढीले मंगलबार हुने चितवन र काठमाडौंबीचको खेलको नतिजा पर्खनुपर्छ । मंगलबार काठमाडौं फराकिलो अन्तरले पराजित धनगढीको अंक गणितीय संभावना रहन्छ । काठमाडौं फराकिलो अन्तरले पराजित भए बुधबारको खेलको नतिजा पनि पर्खनु पर्ने हुन्छ । जुन खेलमा विराटनगर बुटवलसँग पराजित हुनु पर्ने समिकरण छ ।