पोखरा (हाम्रो खेलकुद) – पारस खड्काको कप्तानीमा रहेको चितवन राइनोज अपराजित रहँदै दोस्रो संस्करणको पोखरा प्रिमियर लिग (पीपीएल) को फाइनलमा प्रवेश गरेको छ ।

मंगलबार काठमाडौं गोल्डेन्स वारियर्सलाई ६० रनले पराजित गर्दै फाइनलमा प्रवेश गरेको हो । १ सय ६८ रनको विजयी लक्ष्य पछ्याएको काठमाडौंले २० ओभरमा ९ विकेट गुमाउँदै १ सय ७ रन बनायो । चितवन गत वर्षको उप विजेता टोली समेत हो । पहिलो ओभरको दोस्रो बलमै करण केसीले ओपनर जयकिशन कोल्सावालालाई शून्यमा भुवन कार्कीबाट क्याच गराए । दोस्रो ओभरको चौथो बलमा सन्नी पटेलले अर्का ओपनर अमित श्रेष्ठलाई शून्यमा एलबी डब्लू आउट गर्दै पेभिलिएन फर्काए ।

दुवै ओपनर शून्यमा गुमाएको काठमाडौंको लागि भारतीय ब्याट्सम्यान गौरव तोमर पनि ६ रनमै आउट हुन पुगे । चौथो ओभरको अन्तिम बलमा सन्नीले विकेटकीपर हरि शंकर शाहबाट तोमरलाई स्टम्पिङ आउट गर्दा काठमाडौं १८–३ को कमजोर अवस्थामा पुगेको थियो । चौथो विकेटका लागि कप्तान ज्ञानेन्द्र मल्ल र पवन सरार्फले ४४ रनको साझेदारी गर्दै सुरुवाती दबाब कम गरेका थिए । दशौं ओभरको चौथो बलमा रामनरेश गिरीले पवनलाई २७ रनमा बोल्ड आउट गर्दै साभेदारी तोडे । पवनले १९ बलमा ४ चौका र १ छक्का प्रहार गरे ।

एक एण्डबाट निरन्तर विकेट गुमेपनि अर्कोतर्फबाट कप्तान ज्ञानेन्द्र मल्लले रन जोड्दै आशा कायमै राखेका थिए । तर १३ औं ओभरको पाँचौ पारस खड्काबाट ४० रनमा क्याच आउट गराएपछि काठमाडौंको जितको आशा टाढिएको थियो । ज्ञानेन्द्रले ३९ बलमा ३ चौका र २ छक्का प्रहार गरे । १६ औं ओभरको पाँचौ बलमा पृथु बास्कोटालाई पारस खड्काले रोहन मुस्तफाबाट १८ रनमा क्याच आउट गराए । उनले २३ बलमा २ चौका प्रहार गरे ।

रोहनले १७ औं ओभरको चौथो बलमा दिपेश भण्डारीलाई २ र वसन्त रेग्मीलाई शून्यमा आउट गरेपछि चितवनको फाइनल पक्का बनेको थियो । अमृत भट्टाई ६ रनमा अविजित रहे । चितवनका लागि करण केसीले ४ ओभरमा १३ रन खर्चेर १ विकेट लिए । रोहन मुस्तफाले ४ ओभरमा १ मेडन सहित १२ रन खर्चिदै २ विकेट लिए । सन्नी पटेलले ४ ओभरमा १९ रन खर्चेर ३ विकेट हात पारे । राम नरेश गिरी, भुवन कार्की र पारस खड्काको नाममा १-१ विकेट रह्यो ।

त्यसअघि मंगलबार पोखरा रंगशालामा टस हारेर ब्याटिङ थालेको चितवनले २० ओभरमा ४ विकेट गुमाउँदै १ सय ६७ रन बनाएको थियो। ओपनर रोहन मुस्तफा ५२ बलमा ६ चौका र १ छक्का सहित ५९ रनमा अविजित रहे । रोहनले १८ औं ओभरको पहिलो बलमा वसन्त रेग्मीलाई छक्का प्रहार गर्दै ४७ बलमा अर्धशतक पुरा गरेका थिए ।

दोस्रो ओभरको चौथो बलमा स्पिनर सुसन भारीले ओपनर करण केसीलाई १ रनमा विकेटकीपर जयकिशन कोल्सावालाबाट क्याच गराए । सुरुवाती दुई रनमै ओपनर करणलाई गुमाएको चितवनलाई बाबर हायत र रोहन मुस्तफाले दोस्रो विकेटका लागि १ सय १९ रनको उत्कृष्ट शतकीय साझेदारी गरेका थिए ।

वसन्त रेग्मीलाई १६ औं ओभरको दोस्रो बलमा लगातार छक्का प्रहार गर्ने धुनमा बाबर ७० रनमा बोल्ड भए । बाबरले ४७ बलमा ६ छक्का र ३ चौका प्रहार गरे । बाबरले १५ औं ओभरको दोस्रो बलमा दिपेश भण्डारीलाई छक्का प्रहार गर्दै ४२ बलमा अर्ध शतक प्रहार गरेका थिए । आरिफ शेख ९ बलमा १ छक्का सहित १५ रनमा क्याच आउट भए ।

अमर सिंह राउटेलाको १९ औं ओभरको दोस्रो बलमा ठूलो सट खेल्ने धुनमा आरिफ बाउन्ड्री लाइन नजिकै गौरव तोमरबाट क्याच आउट हुन पुगे । सन्नी पटेल १५ रनमा रन आउट भए । अन्तिम ओभरको अन्तिम बलमा रन आउट हुनुअघि सन्नीले ८ बलमा १ चौका र १ छक्का प्रहार गरे ।

वसन्त रेग्मीले ४ ओभरमा ३७ रन खर्चेर १ विकेट लिए । सुसन भारीले ३ ओभरमा १ मेडन सहित १७ रन खर्चेर १ विकेट लिए । अमर सिंह राउटेलालो ४ ओभरमा ३२ रन खर्चेर १ विकेट लिन सफल रहे । भारतीय बलर दिपेश भण्डारीले ४ ओभरमा ४८ रन खर्चिए पनि कुनै विकेट लिन सकेनन् ।

चितवनले पहिलो खेलमा पोखरा पल्टनलाई ६ विकेट र दोस्रो खेलमा बुटवललाई १ सय १९ रनको पराजित गरेको थियो । तेस्रो खेलमा चितवनले धनगढीलाई ५२ रन र चौथोमा विराटनगरलाई १८ रनले हराएको थियो । चितवन अपराजित रहँदै फाइनलमा प्रवेश गरेको हो । उपाधिको लागि चितवनले एलिमिनेटरको विजेतासँग पुष १२ मा खेल्ने छ ।

काठमाडौं पहिलो खेलमा पोखरा पल्टनसँग ९ विकेटले पराजित भएको थियो । काठमाडौं दोस्रो खेलमा बुटवल ब्लास्टर्ससँग सुपर ओभरमा पराजित भएको थियो । तेस्रो खेलमा धनगढीलाई काठमाडौंले १ सय ६ रन विराटनगरलाई ३६ रनले हराएको थियो । काठमाडौंको प्ले अवको यात्रा बुधबार हुने विराटनगर टाइटन्स र बुटवल ब्लास्टर्सबीचको नतिजामा भर पर्ने छ । विराटनगरले अप्रात्याशित फराकिलो जित ननिकाले काठमाडौं प्लेअफमा पुग्नेछ ।