पोखरा (हाम्रो खेलकुद) – विराटनगर टाइटन्सका कप्तान प्रदीप ऐरीले आफुहरु च्याम्पियन जस्तै खेलेको बताएका छन् । विहीबार बुटवल ब्लास्टर्सलाई २१ रनले हराउँदै फाइनलमा स्थान बनाएपछि कप्तान प्रदीपले पत्रकारसँगको कुराकानीमा यस्तो प्रतिक्रिया दिएका हुन् ।

‘हामीहरुले खेल राम्रो खेल्यौं । पछिल्ला दुई खेलमा हामीले च्याम्पियन जस्तै खेलेका छौं । फाइनलमा यहि लयलाई निरन्तरता दिन चाहान्छौं,’ उनले भने,’अझै पनि हामीले सुधार गर्न धेरै बाँकी छ । फिल्डिङमा कमजोर भएको छ । बलिङमा सुधार गर्न बाँकी छ, ब्याटिङ राम्रो भएको छ । फिल्डिङ र बलिङ सुधार गर्यौ भने च्याम्पियन बन्न सक्छौं ।’

प्रदीपले बुटवलविरुद्ध ब्याटिङ योजनाअनुसार चल्दा सहज भएको बताए । ‘सुुरुवातमा सुनिलले एकदमै राम्रो खेल्यो । उसले एक एण्ड सम्हाल्दै रन जोडिरह्यो । टोलीमा फिनिसर राम्रो थियौं । पछि म गएर फिनिसिङ गर्छु भन्ने सोचेको थिएँ, त्यसै गर्न सफल भयौं । पुनित साथ हुँदा पनि सहज भयो,’ उनले भने ।

‘हाम्रो टोली युवा छ, अनुभवको कमी छ । त्यसैले होला नतिजा पनि तलमाथि भइरहेको छ । फिल्डिङमा सुधार गर्न बाँकी छ । मैलै यसभन्दा अघि भनेको थिएँ, हामी च्याम्पियन बन्न र फाइनल खेल्न नै आएका हौं । खेल पिच्छे प्रदर्शन सुधारिँदै गएको छ’, उनले थपे ।

बुटवलका तीनै भारतीय खेलाडीको विकेट लिएका स्पिनर साहब आलमले आफ्नो लक्ष्य भारतीय खेलाडीलाई रोक्ने रहेकोमा सफल हुँदा जित हासिल गरेको बताए । फाइनल जित्नको लागि आफ्नो ब्याट्सम्यानहरुले राम्रो खेल्नुपर्ने बताउछन् । आलम म्यान अफ द म्याच चुनिएका थिए ।

फाइनल शनिबार हुने छ । विराटनगर क्वालिफायरमा जित दर्ता गर्दै उपाधि भिडन्तमा पुग्दा पारस खड्काको कप्तानीमा रहेको चितवन राइनोज लिग चरणमा अपराजित हुँदै शीर्षस्थानमा रहेर फाइनलमा पुगेको थियो ।