पोखरा (हाम्रो खेलकुद) – पोखरा प्रिमियर लिग (पीपीएल) को फाइनलको अघिल्लो दिन मैत्रीपूर्ण खेलमा पीपीएल ११ ले खेलकुद पत्रकार ११ लाई पराजित गरेको छ । शुक्रबार पीपीएल ११ ले खेलकुद पत्रकार ११ लाई १८ रनले पराजित गरेको हो ।

पोखरा रंगशालामा शुक्रबार जितका लागि १ सय १५ रनको विजयी लक्ष्य पछ्याएको खेलकुद पत्रकार ११ ले निर्धारित १२ ओभरमा ९ विकेट गुमाउँदै ९६ रन मात्र बनाउन सक्यो । खेलकुद पत्रकार ११ को लागि क्रिकेटिङ नेपालका आर्दश ढकालले १८, हाम्रो खेलकुदका भुपेन्द्र जिसीले १६, बुटवलरका सन्दीप पौडेलले ११, विपुल भट्टटाईले १२ र नेपाल खेलकुद पत्रकार मन्चका अध्यक्ष दुर्गानाथ सुवेदीले ३ रन जोडे ।

पीपीएल ११ को लागि विराटनगर टाइटन्सका व्यवस्थापक विजय कुमार धिताल, शनिस र सचिन तिमल्सिनाले २–२ विकेट लिए । पूर्व महिला राष्ट्रिय टोली तथा काठमाडौं गोल्डेन्स वारियर्सका प्रशिक्षक राजु बस्नेतले १ विकेट लिए ।

पहिला ब्याटिङ थालेको पीपीएल ११ ले निर्धारित १२ ओभरमा ७ विकेट गुमाउँदै १ सय १४ रन बनाएको थियो । उसका पुर्व राष्ट्रिय क्रिकेट खेलाडी प्रफुल्ल वैद्यले सर्वाधिक ५२ रनको योगदान दिए । पोखरा पल्टनका प्रशिक्षक रिजन फ्रजु २२ रन र राजु बस्नेतले ६ जोडे । खेलकुद पत्रकार ११ को लागि हाम्रो खेलकुदका सुबास हुमागाईं र यू१९ महिला टोलीका प्रशिक्षक कलाम अलीले समान २-२ विकेट लिए ।