सुनसरी (हाम्रो खेलकुद) – त्रिभुवन आर्मी क्लब सुनसरीको इनरुवामा जारी मनमोहन मेमोरियल राष्ट्रिय एकदिवसिय क्रिकेट प्रतियोगिताको सेमिफाइनलमा प्रवेश गरेको छ ।

मंगलबार आयोजक एमएमसीसी इनरुवालाई १० विकेटले हराउँदै आर्मी समुह ए को विजेता बन्दै सेमिफाइनलमा पुगेको हो । इनरुवाले प्रस्तुत गरेको ५७ रनको सामान्य लक्ष्य आर्मीले ५ ओभरमा कुनै विकेट नगुमाई पुरा गर्यो । आर्मीका ओपनर कुशल मल्ल १९ बलमा ५ चौका र २ छक्का सहित ३५ रनमा अविजित रहे । त्यस्तै अर्का ओपनर हरिकृष्ण झा ११ बलमा २ चौका र १ छक्का सहित २० रनमा अविजित रहे ।

त्यसअघि सुनसरीको इनरुवा क्रिकेट मैदानमा टस जितेर ब्याटिङ थालेको इनरुवा १९.३ ओभरमा ५६ रनमा अल आउट भएको थियो । इनरुवाका ५ खेलाडीले खाता खोल्न सकेनन् । दुई ब्याट्सम्यानले मात्र दोहोरो अंकमा रन जोडेका थिए ।

सुशनले पाँचौ ओभरको तेस्रो बलमा रवि रोयलाई २ रनमा एलबी डब्लू आउट गरे । लगत्तै अर्को बलमा बिवेक मेहेतालाई भारीले भिम सार्कीबाट शून्यमा आउट गरे । भिम सार्कीले एक हातले सट कभरमा उत्कृष्ट क्याच लिएका थिए ।

भारीले आठौं ओभरको दोस्रो बलमा ओपनर सुशान्त तिमिल्सिनालाई कुशल मल्लबाट १५ रनमा क्याच आउट गराए । भारीले तेस्रो बलमा अलफज मनसुरीलाई शून्यमा कट एण्ड बोल्ड आउट गरे । चौथो बलमा कप्तान सरोज बस्नेतलाई शून्यमा एलबी डब्लू आउट गर्दै भारीले ह्याट्रिक पुरा गरेका थिए । अन्तिम बलमा राकेश सोनीलाई भारीले शून्यमा बोल्ड आउट गरे । भारीले समग्रमा आठौं ओभरमा ह्याट्रिक सहित ४ विकेट लिदा कुनै रन दिएनन् ।

सुरुवाती ६ विकेटनै भारीले लिएपछि आयोजक इनरुवामा सस्तैमा समेटिएको हो । ओपनर सुशान्त र रविले ५।३ ओभरमा पहिलो विकेटका लागि १६ रनको साझेदारी गरेका थिए । इनरुवाले २ रन जोड्न प्रमुख ६ ब्याट्सम्यान गुमाएको थियो ।

मध्यगतिका बलर हरिबहादुर चौहानले रुपेश श्रीवाष्तवलाई ६ रनमा बोल्ड आउट गरे । हरिलेनै सोनु मण्डललाई हरिकृष्ण झाबाट १३ रनमा क्याच आउट गराए । सोनुले १६ बलमा २ चौका प्रहार गरे । सुशनले अन्तिम विकेटका रुपमा भुपाल लुइटेललाई भिम सार्कीबाट शून्यमा क्याच गराउँदै ब्यक्तिगत ७ विकेट पुरा गरेका थिए । सुशन भारीले ८.३ ओभरमा ३ मेडन सहित १६ रन खर्चेर ७ विकेट लिए । हरि बहादुर चौहान २ र साहब आलमले १ विकेट लिए ।

आर्मीले सेमिफाइनलमा माघ १ मा प्रदेश नम्बर ३ विरुद्ध खेल्ने छ । योसँगै समुह ए बाट सशस्त्र प्रहरी बल एपीएफ र आयोजक इनरुवा बाहिरिएका छन् ।