एजेन्सी – ओपनर रोहित शर्माको शतक र कप्तान विराट कोहलीको उत्कृष्ट ब्याटिङमा अष्ट्रेलियासगको तीन एकदिवसीय सिरिज घरेलुु टोली भारतले जितेको छ । आइतबार अष्ट्रेलियालाई ७ विकेटले हराउँदै २-१ ले जितेको हो । पहिलो खेलमा १० विकेटले पराजित भएको भारतले दोस्रो खेलमा अष्ट्रेलियालाई ३६ रनले हराएको थियो ।

२ सय ८७ रनको विजयी लक्ष्य पछयाएको भारतले ४७.३ ओभरमा ३ विकेट गुमाउँदै पूरा गर्यो । भारतको जितमा ओपनर रोहित शर्माले १ सय १९ रनको योगदान दिए । ३७ औं ओभरको चौथो बलमा एडम जम्पाले मिचेल स्टार्कबाट क्याच गराउनु अघि रोहितले १ सय २८ बलमा ६ छक्का र ८ चौका प्रहार गरे । रोहितको यो एकदिवसीयमा २९ औं शतक हो ।

रोहितले दोस्रो विकेटका लागि कप्तान विराट कोहलीसग १ सय ३७ रनको साझेदारी गर्दै सहज जित तर्फ लम्काएका थिए । कप्तान विराट कोहली ९१ बलमा ८ चौका सहित ८९ रनमा आउट भए । कोहलीलाई जोश हेजलवुडले ४६ औं ओभरको पाँचौ बलमा बोल्ड आउट गरे ।

युवा ब्याट्सम्यान श्रेयर ऎर ३५ बलमा ६ चौका र १ छक्का सहित ४४ रनमा अविजित रहे । ओपनर लोकेश राहुल १९ रनमा आउट हुँदा मनिष पान्डे ८ रनमा नट आउट रहे । अष्ट्रेलियाका एडम जम्पा, जोश हेजलवुड र एस्टन अगरले १-१ विकेट लिए ।

त्यस अघि टस जितेर ब्याटिङ रोजेको अष्ट्रेलियाले निर्धारित ५० ओभरमा ९ विकेट गुमाउँदै २ सय ८६ रन बनाएको थियोे । पुर्व कप्तान स्टिभ स्मिथले १ सय ३१ रनको शतकिय इनिङ खेलेपनि टोलीको हार टार्न सकेनन् । ओडिआइ करिअरको नवौं शतक प्रहार गरेका स्मिथले १ सय ३२ बलमा १४ चौका र १ छक्का प्रहार गरे ।

स्मिथलाई ४८ औं ओभरको पहिलो बलमा मोहम्मद शामीले श्रेयर ऎरबाट क्याच आउट गराएका थिए । चौथो ओभरको दोस्रो बलमा ओपनर डेविड वार्नरलाई मोहम्मद शामीले विकेटकिपर लोकेश राहुलबाट ३ रनमा क्याच गराए । नवौं ओभरको पाँचौ बलमा कप्तान आरोन फिन्च स्टिभ स्मिथसग तालमेल गर्न नसक्दा १९ रनमा रन आउट भए ।

फिन्चले २६ बलमा १ चौका र १ छक्का प्रहार गरे । दुबै ओपनरलाई सस्तैमा गुमाएको अष्ट्रेलियालाई तेस्रो विकेटका लागि स्मिथ र युवा खेलाडी मार्नस लाबुसेनले १ सय २७ रनको सतकिय साझेदारी गर्दै बलियो योगफलमा पुर्याएका थिए । रविन्द्र जडेजाले ३२ औं ओभरको तेस्रो बलमा लाबुसेनलाई ५४ रनमा कप्तान विराट कोहलीबाट क्याच गराउदै साझेदारी तोडेका थिए ।

एक दिवसीय खेलमा पहिलो अर्ध शतक प्रहार गरेका लाबुसेनले ६४ बलमा ५ चौका प्रहार गरे । विकेटकिपर एलेक्स करिले ३६ बलमा ६ चौका सहित ३५ रन जोडै टोलीलाई बलियो योगफल तर्फ लगेका थिए । कुलदिप यादवलाइ ४२ औं ओभरको चौथो बलमा ठुलो सट खेल्ने धुनमा करि श्रेयरबाट क्याच आउट पुन पुगेका थिए । एस्टन टर्नर ४ रनमा क्याच आउट भए । एस्टन अगर ११ रनमा नट आउट रहे ।

भारतका तीब्र गतिका बलर मोहम्मद शामीले १० ओभरमा ६३ रन खर्चेर ४ विकेट लिए । स्पिनर रविन्द्र जडेजाले १० ओभरमा १ मेडन सहित ४४ रन खर्चेर २ विकेट लिए । कुलदिप यादव र नवदिप सैनिको नाममा १-१ विकेट रह्यो ।