काठमाडौं (हाम्रो खेलकुद) – राष्ट्रिय क्रिकेट टोलीका कप्तान ज्ञानेन्द्र मल्लले आईसीसी विश्वकप लिग-२ मा नेपालको लक्ष्य शीर्ष दुईमा अन्त्य गर्ने रहेको बताएका छन् ।

टियु क्रिकेट मैदानमा माघ २२ देखि २९ सम्म हुने ओमान र अमेरिकासँगको त्रिकोणात्मक सिरिजको लागि आईतबार आयोजना स्थलमा अभ्यासरत ज्ञानेन्द्रले हाम्रो खेलकुदसँगको कुराकानीमा यस्तो बताएका हुन् । उनले टोलीका सबै खेलाडी लगातार क्रिकेट खेलिरहेकाले राम्रो नतिजाको अपेक्षा गरेको बताए । ‘हाम्रो लागि यो ऐतिहासिक क्षण हो । तयारी राम्रो भएको छ र मैदान पनि राम्रो बनिरहेको छ । सबै खेलाडी दुई-तीन महिनादेखि क्रिकेटमै व्यस्त छन् । अब प्रतियोगितामा प्रर्दशन कस्तो हुन्छ त्यो महत्त्वपूर्ण हुन्छ, ‘ ज्ञानेन्द्रले भने ।

दुई अनुभवी खेलाडी वसन्त रेग्मी र सोमपाल कामी टोलीमा नहुँदा केहि समस्या हुन सक्ने बताउँछन् । ‘अनुभवी खेलाडी नहुँदा टोलीमा केहि असर त पर्छ नै । अझ ओडीआईमा सोमपालको प्रर्दशन हेर्ने हो भने उसको ब्याटिङ र बलिङ दुवै उत्कृष्ट रहँदै आएको छ । उनको स्थानमा आएका युवा खेलाडीले उमेर र घरेलु प्रतियोगितामा राम्रो प्रर्दशन गरेका छन् । आशा छ युवा खेलाडीले सोमपालको अभाव हुन दिने छैनन्,’ उनले थपे । ज्ञानेन्द्रले ओडीआई मान्यताभर नेपालको लक्ष्य बेन्च बलियो बनाउने पनि रहेको बताए ।

पछिल्लो समय घरेलु क्रिकेट टि ट्वान्टी प्रतियोगिता हावी हुँदै आएको छ । तीन फ्रेन्चाइज लिग र अन्य स्थानीय टि ट्वान्टी प्रतियोगिताले खेलाडीको खेल्ने शैली पनि परिवर्तन भएको छ । यसको प्रत्यक्ष असर लामो फर्म्याटको खेलमा देखिएको छ ।  दुई साताअघि सुनसरीमा सम्पन्न मनमोहन मेमोरियल एक दिवसीय प्रतियोगितामा हतारिएर आक्रामक ब्याटिङमा गर्ने क्रममा राष्ट्रिय टोलीकै सदस्य रहेका खेलाडीले विकेट गुमाएका थिए ।

त्रिकोणात्मक सिरिजमा पनि सोहि समस्या देखिने डर छ की भन्ने प्रश्नमा ज्ञानेन्द्रले भने, ‘हामीले एकदिवसिय खेल निकै कम खेलेका छौं । त्यसैले यस्तो समस्या देखिएको हो । टि ट्वान्टीमै खेलाडी बढी केन्द्रित हुनाले त्यो समस्या देखिने हो कि भन्ने चिन्ता पनि छ । आशा छ खेलाडीले एकदिवसिय शैलीमा खेल्ने छन्,’ उनले आशा व्यक्त गरे ।

त्रिकोणात्मक सिरिजको लागि ओमान र अमेरिका दुवैले १४ सदस्यीय टोली घोषणा गरि सकेका छन् । ज्ञानेन्द्रले ओमान र अमेरिका राम्रो लयमा रहेको बताउँछन् । ‘टि ट्वान्टी विश्वकपको लागि छनोट भएको ओमानले विश्वकप लिग-२ मा पनि राम्रो सुरुवात गरेको छ । अमेरिकाले पनि पछिल्लो दुई वर्षमा धेरै सुधार गरेको छ । अझ अमेरिकामा दक्षिण अफ्रिकी र वेस्ट इन्डिजका खेलाडी हुँदा झनै बलियो देखिन्छ’, ज्ञानेन्द्रले भने ।

पछिल्लो समय व्यक्तिगत प्रदर्शन हेर्दा ज्ञानेन्द्र राम्रो लयमा देखिएका छन् । दुई महिनाअघि पोखरा प्रिमियर लिगमा उत्कृष्ट ब्याट्सम्यान चुनिएका ज्ञानेन्द्रले धनगढी एक्स्पर्टविरुद्ध ३७ बलमै शतक प्रहार गरेका थिए । तर उनी आफैं विगतको प्रर्दशनले खासै फरक नपार्ने बताउछन् । ‘रन बने पनि नबने पनि विगतको कुरालाई सम्झने कुरा हुँदैन । मैले कति शतक हाने भन्दा पनि खेलमा त्यो दिन कसरी राम्रो गर्न सकिन्छ भन्ने महत्त्वपूर्ण हुन्छ । जित्नको लागि विगतको शतक सम्झेर हुँदैन खेलमा रन हान्नुपर्छ’, ज्ञानेन्द्रले भने ।

सन् २०२३ को विश्वकप पुग्ने बाटोको रुपमा रहेको प्रतियोगितामा नेपाल पहिलो खेल खेल्दैछ । कप्तान ज्ञानेन्द्रले समग्रमा शीर्ष २ मा रहने नेपालको लक्ष्य रहेको बताए । ‘विश्वकप लिग-२ मा नेपालको लक्ष्य शीर्ष दुईमा अन्त्य गर्ने हो । घरेलु मैदानमा राम्रो खेल्दैमा शीर्ष दुईमा अन्त्य गर्न सकिदैन। अवे खेलमा पनि राम्रो गर्न सक्नुपर्छ’, ज्ञानेन्द्रले भने ।

पहिलो दिनको प्रशिक्षणको फोटोफिचर यहाँ