काठमाडौं (हाम्रो खेलकुद) – नेपाल क्रिकेट संघ (क्यान) ले नेपाली राष्ट्रिय पुरुष र महिला क्रिकेट खेलाडीलाई विभिन्न ग्रेडमा राख्ने निर्णय गुर्नको साथै म्याच फि ५ हजार दिने निर्णय गरेको छ ।
क्यानको सिटि अफिस नक्सालमा सोमबार बसेको केन्द्रिय कार्यसमिती बैठकले तीन निर्णय गरेको छ । पुरुषतर्फ २४ खेलाडीलाई क्यानको सेन्ट्रल कन्ट्र्याक्टमा रहने भएका छन् । जसमा ए प्लस, ए बी, सी ग्रेड हुने छन् । महिलातर्फ भने १८ खेलाडी क्यानको सेन्ट्रल कन्ट्र्याक्टमा रहने छन् । जसमा ए, बी सी र ग्रेडमा रहने छन् ।
क्यानका सचिव अशोक नाथ प्याकुरेलले पुरुष २४ र महिला १८ खेलाडीको ग्रेड अनुसार खेलाडी राख्दै क्यानलाई पेश गर्न कोषाध्यक्ष रोशन कुमार सिंहको संयोजकत्वमा केन्द्रिय सदस्य अमितविर पान्डे र दुर्गाराज पाठक रहेको समिती गठन गरेको बताए । उक्त समितीले कुन खेलाडीलाई कुन ग्रेडमा राख्ने भन्ने निर्णय क्यानलाई बुझाउने छ । कुन ग्रेडका खेलाडीले कति तलब पाउने त्यो पनि समितीले क्यानलाई प्रस्ताव गर्ने छ ।
त्यस्तै केन्द्रिय कार्यसमितीले पुष १६ अर्थात जनवरी १ देखी पुरुष खेलाडीलाई हरेक ओडीआई र टि ट्वान्टी आईको म्याच फि ५ हजार दिने निर्णय गरेको छ । महिला खेलाडीलाई भने क्यानले म्याच फि तत्काल नदिने निर्णय गरेको छ । त्यस्तै क्यानले चैत्र तेस्रो हप्ता देखी काठमाडौंमा एक दिवसिय प्रतियोगिता आयोजना गर्ने निर्णय गरेको सचिव प्याकुरेलले हाम्रो खेलकुदलाई जानकारी दिए ।
