काठमाडौं (हाम्रो खेलकुद) – राष्ट्रिय क्रिकेट टोलीका कप्तान ज्ञानेन्द्र मल्लले ओमान र अमेरिकासँग आईसीसी विश्वकप लिग २ त्रिकोणात्मक सिरिजमा धेरै कुरा सिक्न पाएको बताएका छन् ।

बुधबार त्रिकोणात्मक सिरिजको अन्तिम खेलमा अमेरिकालाई ८ विकेटले पराजित गरेपछि ज्ञानेन्द्रले पत्रकारसँगको कुराकानीमा यस्तो बताएका हुन् । ‘सिरिजको अन्तिम खेल भएको हुँदा हामीले जितको साथनै अन्त्य गर्न चाहन्थ्यौं । सन्दीप र सुशनले जसरी बलिङ गरे त्यसले आशा अनुसार भन्दा चाडैं र राम्रो नतिजा आयो’, ज्ञानेन्द्रले भने, ‘सिरिजबाट धेरै कुरा सिक्न पायौं र आगमी दिनमा धेरै राम्रो गर्न सक्छौं ।’

ज्ञानेन्द्र ओडीआईमा शैलीमा मिहिनेत गर्न अझ धेरै बाँकी रहेको बताउछन् । ‘हामीले नयाँ खेलाडी तयार भएको पनि देख्यौं । राम्रो टोली अमेरिकालाई हरायौं । ओमानसँग पनि धेरै नजिक पुगेर हारेका थियौं । प्रर्दशनमा तल माथि त भयौ नै तर पनि हामीले अगाडी अझै राम्रो गर्न सक्छौं’ ।

ओमानका ब्याट्सम्यानबाट धेरै कुरा सिक्न सकिने ज्ञानेन्द्र बताउँछन् । ओमानका ब्याट्सम्यानले सुरुवात पाईसकेपछि जसरी अन्त्य गरे,त्यसरीनै हामीले सुरुवातलाई ठूलो इनिङमा बदल्दै फिनिसिङ गर्न सक्नुपर्छ, ज्ञानेन्द्रले भने ।