एजेन्सी– भारतका विष्फोटक ओपनर ब्याट्सम्यान रोहित शर्माले मात्र आधुनिक टि२० क्रिकेटमा दोहोरो शतक बनाउन सक्ने अष्ट्रेलियाका पुर्व खेलाडी ब्राड हगले बताएका छन् ।

सामाजिक सञ्जाल ट्विटरमा शिवम जैसवाल नाम गरेका समर्थकले टि२० मा पहिलो दोहोरो शतक कसले बनाउन सक्छ भनेर सोधेको प्रश्नमा उनले यस्तो जवाफमा दिएका हुन् । ‘वर्तमान क्रिकेटमा रोहित मात्र यस्ता खेलाडी हुन् जोसँग टि२० मा दोहोरो शतक बनाउन सक्ने क्षमता छ,’ उनले थपे, ‘उनको स्ट्राइक रेट राम्रो छ । उनले मैदानको सबै तिर छक्का प्रहार गर्न सक्छन् र टाइमिङ पनि राम्रो छ ।’

रोहित टि२० आइमा ४ शतक प्रहार गर्ने एक्लो ब्याट्सम्यान हुन् । उनले १ सय टि२० इनिङमा ४ शतक र २१ अर्ध शतक सहित २ हजार ७ सय ७३ रन जोडेका छन् । रोहितले एकदिवसिय खेलमा तीन दोहोरो शतक प्रहार गरेका छन् । रोहितसँग एक दिवसिय खेलमा एकै इनिङमा सर्वाधिक रन बनाउने कीर्तिमान पनि छ । सन् २०१४ मा कोलकातामा श्रीलंकाविरुद्ध चौथो एक दिवसिय खेलमा रोहितले १ सय ७३ बलमा ३३ चौका र ९ छक्का सहित २ सय ६४ रनको दुर्लभ इनिङ खेलेका थिए ।

टि२० आइ एकै इनिङमा सर्वाधिक रन बनाउने कीर्तिमान अष्ट्रेलियाका कप्तान आरोन फिन्चको नाममा छ । २०१८ मा फिन्चले जिम्बावेविरुद्ध ७६ बलमा १६ चौका र १० छक्का सहित १ सय ७२ रन प्रहार गरेका थिए । टि२० इतिहासमै एक इनिङमा सर्वाधिक रन बनाउने कीर्तिमान भने वेस्टइन्डिजका ओपनर क्रिस गेलको नाममा छ । गेलले सन् २०१३ को आइपिएलमा रोयल च्यालेन्जर्स बेंगलोरबाट पुने वारियर्सविरुद्ध ६६ बलमा १३ चौका र १७ छक्का सहित १ सय ७५ रनको इनिङ खेलेका थिए ।